കോമൺവെൽത്ത് ഗെയിംസ്: ഭാരോദ്വഹനത്തിൽ ഋഷികാന്ത സിങ്ങിന് വെള്ളി; ഇന്ത്യയ്ക്ക് രണ്ടാം മെഡൽ

കോമൺവെൽത്ത് ഗെയിംസിൽ ഇന്ത്യയ്ക്ക് രണ്ടാം മെഡൽ. ഭാരോദ്വഹനത്തിൽ പുരുഷന്മാരുടെ 60 കിലോഗ്രാം വിഭാഗത്തിൽ ഇന്ത്യയുടെ ചനംബാം ഋഷികാന്ത സിങ് വെള്ളി നേടി. മത്സരത്തിൽ മലേഷ്യയുടെ ബിൻ കസ്ദാൻ മുഹമ്മദ് അനിഖ് സ്വർണവും കെനിയയുടെ ജോഷ്വ അമുൻഗ എംബോയ വെങ്കലവും സ്വന്തമാക്കി. നേരത്തെ പാരാ പവർ ലിഫ്റ്റിങ്ങിൽ ഝണ്ഡു കുമാർ ഇന്ത്യയ്ക്കായി വെങ്കലം നേടിയിരുന്നു.

സ്നാച്ച് വിഭാഗത്തിൽ ഗെയിംസ് റെക്കോർഡോടെയാണ് ഋഷികാന്ത തിളങ്ങിയത്. ആദ്യ ശ്രമത്തിൽ 116 കിലോയും രണ്ടാം ശ്രമത്തിൽ 119 കിലോയും വിജയകരമായി ഉയർത്തിയ താരം മൂന്നാം ശ്രമത്തിൽ 121 കിലോ ഉയർത്തിയാണ് മികച്ച പ്രകടനം പുറത്തെടുത്തത്. എന്നാൽ ക്ലീൻ ആൻഡ് ജെർക്ക് വിഭാഗത്തിൽ ആദ്യ ശ്രമത്തിൽ 143 കിലോ ഉയർത്തിയെങ്കിലും അടുത്ത ശ്രമങ്ങൾ പരാജയപ്പെട്ടതോടെ ആകെ 264 കിലോ ഉയർത്തി വെള്ളിയിൽ ഒതുങ്ങി. ആകെ 273 കിലോ ഉയർത്തിയാണ് മലേഷ്യൻ താരം സ്വർണം ഉറപ്പിച്ചത്.

ഇംഫാലിലെ നാഷണൽ സ്‌പോർട്‌സ് അക്കാദമിയിലൂടെ വളർന്നുവന്ന ഋഷികാന്ത, കഴിഞ്ഞ വർഷം അഹമ്മദാബാദിൽ നടന്ന കോമൺവെൽത്ത് വെയ്റ്റ്‌ലിഫ്റ്റിങ് ചാമ്പ്യൻഷിപ്പിൽ ദേശീയ റെക്കോർഡോടെ സ്വർണം നേടിയിരുന്നു.