തോറ്റെങ്കിലും ക്വാളിഫയർ വൺ ഉറപ്പിച്ച് ആർ.സി.ബി; തകർപ്പൻ ജയവുമായി ഹൈദരാബാദ്

ഐ.പി.എല്ലിൽ സൺറൈസേഴ്സ് ഹൈദരാബാദിനോട് പരാജയപ്പെട്ടെങ്കിലും പോയിന്റ് പട്ടികയിലെ നെറ്റ് റൺറേറ്റിന്റെ കരുത്തിൽ റോയൽ ചലഞ്ചേഴ്സ് ബെംഗളൂരു ക്വാളിഫയർ വണ്ണിലേക്ക് യോഗ്യത നേടി. മത്സരത്തിൽ 90 റൺസിന്റെയെങ്കിലും വൻ മാർജിനിൽ ജയിച്ചാൽ മാത്രമേ ഹൈദരാബാദിന് ക്വാളിഫയർ വൺ ഉറപ്പാക്കാൻ സാധിക്കുമായിരുന്നുള്ളൂ. എന്നാൽ, പോരാട്ടത്തിനൊടുവിൽ 55 റൺസിനാണ് ഹൈദരാബാദ് വിജയം സ്വന്തമാക്കിയത്. ഇതോടെ ഒന്നാം സ്ഥാനക്കാരായി ഫിനിഷ് ചെയ്ത ആർ.സി.ബി. ക്വാളിഫയർ വണ്ണിൽ ഗുജറാത്തുമായി ഏറ്റുമുട്ടും.

ഹൈദരാബാദ് ഉയർത്തിയ 256 റൺസ് എന്ന കൂറ്റൻ വിജയലക്ഷ്യം പിന്തുടർന്ന ബെംഗളൂരുവിന് 20 ഓവറിൽ 4 വിക്കറ്റ് നഷ്ടത്തിൽ 200 റൺസെടുക്കാനേ സാധിച്ചുള്ളൂ. മറുപടി ബാറ്റിങ്ങിൽ വെങ്കടേഷ് അയ്യർ (19 പന്തിൽ 44) ആർ.സി.ബിക്ക് വെടിക്കെട്ട് തുടക്കം നൽകിയെങ്കിലും മറ്റ് മുൻനിര താരങ്ങൾക്ക് ഇത് നിലനിർത്താനായില്ല. വിരാട് കോലി 15 റൺസുമായും ദേവ്ദത്ത് പടിക്കൽ 21 റൺസുമായും പുറത്തായതോടെ ആർ.സി.ബി. പ്രതിരോധത്തിലായി. എന്നാൽ, നാലാം വിക്കറ്റിൽ ഒന്നിച്ച രജത് പാട്ടിദാറും (56) ക്രുണാൽ പാണ്ഡ്യയും ചേർന്ന് ടീം സ്കോർ 165 കടത്തിയതോടെ തന്നെ ആർ.സി.ബിയുടെ ക്വാളിഫയർ വൺ പ്രവേശനം സുരക്ഷിതമായിരുന്നു.

നേരത്തെ ടോസ് നേടി ബാറ്റിങ്ങിനിറങ്ങിയ ഹൈദരാബാദ് നിശ്ചിത 20 ഓവറിൽ 4 വിക്കറ്റ് നഷ്ടത്തിലാണ് 255 റൺസെന്ന ഹിമാലയൻ സ്കോർ പടുത്തുയർത്തിയത്. ഓപ്പണർമാരായ അഭിഷേക് ശർമ്മയും (22 പന്തിൽ 56) ട്രാവിസ് ഹെഡും നൽകിയ മികച്ച തുടക്കത്തിന് പിന്നാലെ മധ്യനിരയിൽ ഹെൻറിച്ച് ക്ലാസനും ഇഷാൻ കിഷനും ചേർന്ന് ആർ.സി.ബി. ബൗളർമാരെ നിലംപരിശാക്കുകയായിരുന്നു.

ക്ലാസൻ 24 പന്തിൽ 51 റൺസെടുത്തു പുറത്തായപ്പോൾ, 46 പന്തിൽ 79 റൺസ് അടിച്ചുകൂട്ടിയ ഇഷാൻ കിഷനാണ് ഹൈദരാബാദിന്റെ ടോപ് സ്കോറർ. അവസാന ഓവറുകളിൽ നിതീഷ് കുമാർ റെഡ്ഡിയും തകർത്തടിച്ചതോടെയാണ് ഹൈദരാബാദ് സ്കോർ 250 കടത്തിയത്. ആർ.സി.ബി. നിരയിൽ ബൗളർമാർ കണക്കറ്റ് പ്രഹരം ഏറ്റുവാങ്ങി.