ചരിത്രം കുറിച്ച് ഭുവനേശ്വർ; 2028 ലോക ഇൻഡോർ അത്ലറ്റിക്സ് ചാമ്പ്യൻഷിപ്പിന് ഇന്ത്യ വേദിയാകും
ഇന്ത്യൻ കായിക ചരിത്രത്തിൽ സുവർണ്ണ ലിപികളാൽ എഴുതപ്പെടേണ്ട മറ്റൊരു നാഴികക്കല്ല് കൂടി. 2028-ലെ ലോക ഇൻഡോർ അത്ലറ്റിക്സ് ചാമ്പ്യൻഷിപ്പിന് ഒഡീഷയുടെ തലസ്ഥാനമായ ഭുവനേശ്വർ വേദിയാകും. പോളണ്ടിലെ ടോറൂണിൽ നടന്ന വേൾഡ് അത്ലറ്റിക്സ് കൗൺസിൽ യോഗത്തിലാണ് ഈ ചരിത്രപരമായ തീരുമാനം പ്രഖ്യാപിച്ചത്. ആദ്യമായാണ് ലോക ഇൻഡോർ അത്ലറ്റിക്സ് ചാമ്പ്യൻഷിപ്പിന് ഇന്ത്യ ആതിഥേയത്വം വഹിക്കുന്നത്.
ലോക റെക്കോർഡ് ഉടമയും പോൾവോൾട്ട് ഇതിഹാസവുമായ അർമാൻഡ് മോണ്ടോ ഡുപ്ലാന്റിസ് ഉൾപ്പെടെയുള്ള ആഗോള കായിക താരങ്ങൾ ഭുവനേശ്വറിലെ കലിംഗ സ്റ്റേഡിയത്തിൽ മാറ്റുരയ്ക്കാനെത്തും. നീരജ് ചോപ്രയുടെ ഒളിമ്പിക്സ്, ലോക ചാമ്പ്യൻഷിപ്പ് വിജയങ്ങൾക്ക് ശേഷം ഇന്ത്യൻ അത്ലറ്റിക്സിന് അന്താരാഷ്ട്ര തലത്തിൽ ലഭിക്കുന്ന ഏറ്റവും വലിയ അംഗീകാരമാണിതെന്ന് അത്ലറ്റിക്സ് ഫെഡറേഷൻ ഓഫ് ഇന്ത്യ (AFI) പ്രസിഡന്റ് ബഹദൂർ സിങ് സഗൂ പറഞ്ഞു.
ഔട്ട്ഡോർ മത്സരങ്ങളിൽ നിന്ന് വ്യത്യസ്തമായി 200 മീറ്റർ ട്രാക്കിലാണ് ഇൻഡോർ മത്സരങ്ങൾ നടക്കുക. 100 മീറ്ററിന് പകരം 60 മീറ്റർ സ്പ്രിന്റാണ് ഇതിന്റെ പ്രധാന ആകർഷണം. സാധാരണയായി ജനുവരി-മാർച്ച് മാസങ്ങളിൽ വിശ്രമത്തിലായിരുന്ന ഇന്ത്യൻ താരങ്ങൾ ഇനി മുതൽ ഇൻഡോർ മത്സരങ്ങൾക്കായി പ്രത്യേക പരിശീലനം നടത്തുമെന്ന് ഇതിഹാസ താരം അഞ്ജു ബോബി ജോർജ് വ്യക്തമാക്കി. 2036 ഒളിമ്പിക്സിന് ആതിഥേയത്വം വഹിക്കാനുള്ള ഇന്ത്യയുടെ വലിയ ലക്ഷ്യത്തിലേക്കുള്ള നിർണ്ണായകമായ ചുവടുവെപ്പായി ഈ ചാമ്പ്യൻഷിപ്പിനെ കായിക ലോകം വിലയിരുത്തുന്നു.