ചരിത്രപ്പോരാട്ടത്തിന് കൊൽക്കത്ത വേദിയാകുന്നു; ഇന്ത്യ-ബ്രസീൽ സൗഹൃദ മത്സരം ഒക്ടോബർ 3-ന്

ഇന്ത്യൻ ഫുട്ബോൾ ആരാധകർക്ക് ആവേശം പകർന്ന് ഇന്ത്യൻ ദേശീയ ടീമും ബ്രസീലും തമ്മിലുള്ള സൗഹൃദ മത്സരം പ്രഖ്യാപിച്ചു. ഈ വർഷം ഒക്ടോബർ മൂന്നിന് കൊൽക്കത്തയിലെ പ്രശസ്തമായ സാൾട്ട് ലേക്ക് സ്റ്റേഡിയത്തിലാണ് ഈ ചരിത്ര പോരാട്ടം നടക്കുക. ഇരുരാജ്യങ്ങളിലെയും ഫുട്‌ബോൾ ഫെഡറേഷനുകൾ വാർത്ത ഔദ്യോഗികമായി സ്ഥിരീകരിച്ചു.

ഇന്ത്യൻ ഫുട്ബോളിന്റെ ചരിത്രത്താളുകളിൽ ഇടംപിടിക്കുന്ന ദിനമായിരിക്കും ഇതെന്ന് ആൾ ഇന്ത്യ ഫുട്ബോൾ ഫെഡറേഷൻ (AIFF) പ്രതികരിച്ചു. ഓസ്‌ട്രേലിയയിലെ മത്സരങ്ങൾക്ക് ശേഷമായിരിക്കും ബ്രസീൽ ടീം ഇന്ത്യയിലേക്ക് എത്തുക.