വാംഖഡെയിൽ ചരിത്രമെഴുതി മുംബൈ ഇന്ത്യൻസ്; കൊൽക്കത്തയുടെ കൂറ്റൻ സ്‌കോർ മറികടന്ന് റെക്കോർഡ് ജയം

ഐപിഎൽ 2026-ൽ സ്വന്തം തട്ടകമായ വാംഖഡെ സ്റ്റേഡിയത്തിൽ കൊൽക്കത്ത നൈറ്റ് റൈഡേഴ്‌സിനെതിരെ മുംബൈ ഇന്ത്യൻസിന് ആവേശകരമായ വിജയം. കൊൽക്കത്ത ഉയർത്തിയ 221 റൺസ് എന്ന കൂറ്റൻ വിജയലക്ഷ്യം അഞ്ച് പന്തുകൾ ബാക്കിനിൽക്കെ നാല് വിക്കറ്റ് നഷ്ടത്തിൽ മുംബൈ മറികടന്നു. വാംഖഡെ സ്റ്റേഡിയത്തിലെ ഏറ്റവും ഉയർന്ന ഐപിഎൽ റൺചേസ് എന്ന റെക്കോർഡും ഈ വിജയത്തോടെ മുംബൈ സ്വന്തമാക്കി. ഒരു പതിറ്റാണ്ടിന് ശേഷം (13 സീസണുകൾ) ആദ്യമായാണ് മുംബൈ ഇന്ത്യൻസ് വിജയത്തോടെ ഐപിഎൽ സീസൺ ആരംഭിക്കുന്നത്.

രോഹിത് ശർമ്മയുടെയും റയാൻ റിക്കെൽട്ടന്റെയും വെടിക്കെട്ട് ബാറ്റിംഗാണ് മുംബൈയുടെ വിജയത്തിന് അടിത്തറയിട്ടത്. ഓപ്പണിംഗ് വിക്കറ്റിൽ ഇരുവരും ചേർന്ന് 11.5 ഓവറിൽ 148 റൺസ് അടിച്ചുകൂട്ടി. 43 പന്തിൽ 81 റൺസ് നേടിയ റിക്കെൽട്ടനും 38 പന്തിൽ 78 റൺസ് നേടിയ രോഹിതും കൊൽക്കത്ത ബൗളർമാരെ നിലംപരിശാക്കി. വെറും 23 പന്തിൽ നിന്ന് അർദ്ധ സെഞ്ച്വറി തികച്ച രോഹിത് ശർമ്മ തന്റെ ഐപിഎൽ കരിയറിലെ വേഗമേറിയ ഫിഫ്റ്റിയും സ്വന്തമാക്കി. അവസാന ഓവറുകളിൽ സൂര്യകുമാർ യാദവ് (16), തിലക് വർമ്മ (20), ക്യാപ്റ്റൻ ഹാർദിക് പാണ്ഡ്യ (18) എന്നിവർ തകർത്തടിച്ചതോടെ 19.1 ഓവറിൽ മുംബൈ ലക്ഷ്യത്തിലെത്തി.

നേരത്തെ ബാറ്റിംഗിനിറങ്ങിയ കൊൽക്കത്ത നൈറ്റ് റൈഡേഴ്‌സ് നിശ്ചിത 20 ഓവറിൽ നാല് വിക്കറ്റ് നഷ്ടത്തിൽ 220 റൺസാണ് നേടിയത്. ക്യാപ്റ്റൻ അജിങ്ക്യ രഹാനെ (40 പന്തിൽ 67), അംഗ്കൃഷ് രഘുവംശി (29 പന്തിൽ 51) എന്നിവരുടെ അർദ്ധ സെഞ്ച്വറികളും ഫിൻ അലന്റെ (37) വെടിക്കെട്ടുമാണ് കെകെആറിന് മികച്ച സ്കോർ നൽകിയത്. അവസാന ഓവറുകളിൽ റിങ്കു സിംഗും (33 നോട്ടൗട്ട്) മികച്ച പ്രകടനം നടത്തി. മുംബൈ നിരയിൽ ഷർദുൽ താക്കൂർ മൂന്ന് വിക്കറ്റുകൾ വീഴ്ത്തി. എന്നാൽ ബൗളിംഗിൽ വരുൺ ചക്രവർത്തി ഉൾപ്പെടെയുള്ളവർ റൺസ് വിട്ടുകൊടുത്തത് കൊൽക്കത്തയ്ക്ക് തിരിച്ചടിയായി.