'വലിയ പ്ലാനൊന്നുമില്ല, പന്ത് കാണുക, അടിക്കുക'; റെക്കോർഡ് റൺവേട്ടയുടെ രഹസ്യം വെളിപ്പെടുത്തി സഞ്ജു സാംസൺ

ന്യൂസീലൻഡിനെതിരായ ആദ്യ ടി20 മത്സരത്തിൽ ചരിത്രപരമായ റെക്കോർഡ് റൺചേസിലൂടെ ഇന്ത്യക്ക് വിജയം സമ്മാനിച്ച മലയാളി താരം സഞ്ജു സാംസൺ തന്റെ തകർപ്പൻ പ്രകടനത്തിന്റെ രഹസ്യം വെളിപ്പെടുത്തി. മത്സരത്തിൽ 33 പന്തിൽ 8 ഫോറും 4 സിക്‌സും സഹിതം 67 റൺസ് നേടിയ താരം പ്ലെയർ ഓഫ് ദ് മാച്ച് പുരസ്കാരവും സ്വന്തമാക്കിയിരുന്നു. മത്സരശേഷം സംസാരിക്കവെയാണ് താനും അഭിഷേക് ശർമയും തമ്മിലുള്ള കൂട്ടുകെട്ടിനെക്കുറിച്ചും ബാറ്റിങ് ശൈലിയെക്കുറിച്ചും സഞ്ജു മനസ്സ് തുറന്നത്.

'വലിയ പ്ലാനുകളൊന്നുമില്ലായിരുന്നു; പന്ത് ശ്രദ്ധിക്കുക, അടിക്കുക' എന്നാണ് അഭിഷേക് ശർമയുമായുള്ള ഓപ്പണിങ് കൂട്ടുകെട്ടിനെക്കുറിച്ച് സഞ്ജു പ്രതികരിച്ചത്. 'ഞങ്ങൾ പരസ്പരം സംസാരിക്കാറുണ്ടെങ്കിലും അതിലൊന്നും വലിയ പ്ലാനുകളോ അർത്ഥമോ ഉണ്ടാകാറില്ല. പന്ത് ശ്രദ്ധിക്കുക, അതിനെ അടിക്കുക എന്നത് മാത്രമാണ് ഞങ്ങൾ ചെയ്യുന്നത്. അഭിഷേകിനൊപ്പം ബാറ്റ് ചെയ്യാൻ വളരെ ആസ്വദിക്കാറുണ്ട്' -സഞ്ജു പറഞ്ഞു.

മത്സരത്തിന്റെ രണ്ടാം പകുതിയിൽ പിച്ചിൽ മഞ്ഞുവീഴ്ചയുണ്ടായ (Dew factor) കാര്യം സഞ്ജു എടുത്തുപറഞ്ഞു. വിക്കറ്റ് കീപ് ചെയ്യുമ്പോൾ പിച്ചിന്റെ സ്വഭാവം മനസിലാക്കാൻ സാധിച്ചെങ്കിലും ബാറ്റിങ്ങിന് ഇറങ്ങിയപ്പോൾ സാഹചര്യങ്ങൾ മാറിമറിഞ്ഞതായി അദ്ദേഹം വ്യക്തമാക്കി. രണ്ടാം പകുതിയിൽ പന്ത് ബാറ്റിലേക്ക് വളരെ കൃത്യമായി വന്നത് ബാറ്റിങ് എളുപ്പമാക്കിയെന്നും, പവർപ്ലേയിൽ തന്നെ മികച്ച തുടക്കം ലഭിച്ചതിനാൽ കളി നേരത്തെ തന്നെ തീർക്കാൻ സാധിക്കുമെന്ന് കരുതിയിരുന്നതായും അദ്ദേഹം കൂട്ടിച്ചേർത്തു. ശനിയാഴ്ച ഇതേ വേദിയിലാണ് പരമ്പരയിലെ രണ്ടാം മത്സരം നടക്കുന്നത്.