പാറ്റ് കമ്മിൻസ് പുറത്ത്; ഓസ്ട്രേലിയൻ ലോകകപ്പ് ടീമിൽ മാറ്റങ്ങൾ
2026-ലെ ഐസിസി പുരുഷ ടി20 ലോകകപ്പിന് മുന്നോടിയായി ഓസ്ട്രേലിയൻ ടീമിന് കനത്ത തിരിച്ചടി. വിട്ടുമാറാത്ത പുറംവേദനയെത്തുടർന്ന് സീനിയർ പേസർ പാറ്റ് കമ്മിൻസ് ടീമിൽ നിന്ന് പുറത്തായി. കമ്മിൻസിന് പൂർണ്ണ കായികക്ഷമത വീണ്ടെടുക്കാൻ കൂടുതൽ സമയം ആവശ്യമാണെന്ന് ക്രിക്കറ്റ് ഓസ്ട്രേലിയ സ്ഥിരീകരിച്ചു.
കമ്മിൻസിന് പകരക്കാരനായി ഇടംകൈയ്യൻ പേസർ ബെൻ ദ്വാർഷുയിസിനെ 15 അംഗ ടീമിൽ ഉൾപ്പെടുത്തിയിട്ടുണ്ട്. ജനുവരിയിൽ നടത്തിയ സ്കാനിംഗിൽ പരിക്കിൽ നിന്ന് പൂർണ്ണമായി മോചിതനായിട്ടില്ലെന്ന് കണ്ടതിനെത്തുടർന്നാണ് കമ്മിൻസിനെ ഒഴിവാക്കാൻ സെലക്ടർമാർ തീരുമാനിച്ചത്.
ബൗളിംഗിന് പുറമെ ബാറ്റിംഗ് നിരയിലും നിർണ്ണായകമായ മാറ്റങ്ങൾ വരുത്തിയിട്ടുണ്ട്. മോശം ഫോമിലായിരുന്ന മാത്യു ഷോട്ടിനെ ടീമിൽ നിന്ന് ഒഴിവാക്കി. ശ്രീലങ്കയിലെ സ്പിൻ പിച്ചുകളെ നേരിടാൻ കൂടുതൽ അനുയോജ്യനായ മാറ്റ് റെൻഷോയെയാണ് ഷോട്ടിന് പകരക്കാരനായി ടീമിലെത്തിച്ചത്. ആഭ്യന്തര ക്രിക്കറ്റിലും ബിഗ് ബാഷ് ലീഗിലും കാഴ്ചവെച്ച മികച്ച പ്രകടനവും പാകിസ്ഥാനെതിരായ ടി20 പരമ്പരയിലെ അരങ്ങേറ്റവുമാണ് റെൻഷോയ്ക്ക് തുണയായത്. മധ്യ ഓവറുകളിൽ സ്പിന്നിനെ നേരിടാനുള്ള റെൻഷോയുടെ കഴിവും ഇടംകൈയ്യൻ ബാറ്ററാണെന്നതും സെലക്ടർമാരുടെ തീരുമാനത്തിൽ നിർണ്ണായകമായി.
ബിഗ് ബാഷ് ലീഗിൽ മികച്ച ഫോമിലായിരുന്നിട്ടും സ്റ്റീവ് സ്മിത്തിന് ലോകകപ്പ് ടീമിൽ ഇടം ലഭിച്ചില്ല. ടീമിലെ ടോപ്പ് ഓർഡർ മിച്ച് മാർഷ്, ട്രാവിസ് ഹെഡ് എന്നിവരിലൂടെ ഭദ്രമാണെന്നും കാമറൂൺ ഗ്രീൻ, ഗ്ലെൻ മാക്സ്വെൽ എന്നിവർ കൂടുതൽ വഴക്കം നൽകുന്നുണ്ടെന്നും സെലക്ടർമാർ വിലയിരുത്തി. സ്പിൻ സാഹചര്യങ്ങൾക്ക് മുൻഗണന നൽകുന്നതിനാലാണ് റെൻഷോയ്ക്ക് നറുക്ക് വീണത്. ഫെബ്രുവരി 11-ന് കൊളംബോയിൽ അയർലൻഡിനെതിരെയാണ് ഓസ്ട്രേലിയയുടെ ആദ്യ മത്സരം.