യൂറോപ്യൻ ഫുട്ബോൾ സീസണിന് ആവേശകരമായ തുടക്കമിട്ട് യുവേഫ സൂപ്പർ കപ്പ് ഫൈനൽ ഇന്ന്. ചാമ്പ്യൻസ് ലീഗ് ജേതാക്കളായ പി.എസ്.ജി.യും യൂറോപ്പ ലീഗ് ചാമ്പ്യന്മാരായ ആസ്റ്റൺ വില്ലയും തമ്മിലാണ് കലാശപ്പോരാട്ടം. ബുധനാഴ്ച രാത്രി 12.30-നാണ് മത്സരം.

തുടർച്ചയായ രണ്ടാം ചാമ്പ്യൻസ് ലീഗ് കിരീടം നേടിയതിന്റെ കരുത്തുമായാണ് ലൂയി എന്റീക്കെയുടെ പി.എസ്.ജി ഇന്നിറങ്ങുന്നത്. ഒസ്മാൻ ഡെംബലെ, ഡെസീറെ ഡുവെ, ഖ്വിച്ച വാരത്‌സ്‌ഹേലിയ എന്നിവരടങ്ങുന്ന മുന്നേറ്റനിരയാണ് ടീമിന്റെ പ്രധാന കരുത്ത്. മറുവശത്ത് ഉനായ് എമറി പരിശീലിപ്പിക്കുന്ന ആസ്റ്റൺ വില്ലയിൽ അലക്സാൻഡ്രോ ഗർനാച്ചോ അരങ്ങേറിയേക്കും. ഒലി വാറ്റ്കിൻസും എമിലിയാനോ മാർട്ടിനെസും അടങ്ങുന്ന നിരയുമായാണ് വില്ല ഇറങ്ങുന്നത്.

ഇരുടീമുകളും രണ്ടാം സൂപ്പർ കപ്പ് കിരീടമാണ് ലക്ഷ്യമിടുന്നത്. കഴിഞ്ഞ വർഷമാണ് പി.എസ്.ജി ആദ്യമായി കിരീടം നേടിയത്. 1982-ലായിരുന്നു വില്ലയുടെ ഏക സൂപ്പർ കപ്പ് വിജയം. വിജയികൾക്ക് 55 കോടി രൂപയും റണ്ണറപ്പിന് 44 കോടി രൂപയുമാണ് സമ്മാനത്തുക.