ദക്ഷിണാഫ്രിക്ക–ന്യൂസിലൻഡ് പോരാട്ടം ഇന്ന്

ടി20 ലോകകപ്പിന്റെ ആവേശകരമായ ആദ്യ സെമി ഫൈനലിൽ ഇന്ന് ദക്ഷിണാഫ്രിക്കയും ന്യൂസിലൻഡും ഏറ്റുമുട്ടും. കൊൽക്കത്തയിലെ ഈഡൻ ഗാർഡൻസിൽ നടക്കുന്ന മത്സരത്തിൽ ടൂർണമെന്റിലുടനീളം അപരാജിത കുതിപ്പ് തുടരുന്ന ദക്ഷിണാഫ്രിക്കയ്ക്കാണ് മുൻതൂക്കം കല്പിക്കുന്നത്. ഗ്രൂപ്പ് ഘട്ടത്തിലും സൂപ്പർ എട്ടിലും തോൽവി അറിയാതെ മുന്നേറുന്ന പ്രോട്ടിയാസ്, ശക്തരായ ഇന്ത്യയെപ്പോലും വൻ തോൽവിയിലേക്ക് തള്ളിവിട്ടാണ് സെമിയിൽ എത്തിയത്. ഗ്രൂപ്പ് റൗണ്ടിൽ ന്യൂസിലൻഡിനെതിരെ നേടിയ തകർപ്പൻ വിജയം എയ്ഡൻ മാർക്രമിനും സംഘത്തിനും ആത്മവിശ്വാസം നൽകുന്നുണ്ട്. അന്ന് കിവികൾ ഉയർത്തിയ 175 റൺസ് എന്ന വലിയ ലക്ഷ്യം വെറും മൂന്ന് വിക്കറ്റ് നഷ്ടത്തിലാണ് ദക്ഷിണാഫ്രിക്ക മറികടന്നത്.

മറുഭാഗത്ത്, നാടകീയമായ സാഹചര്യങ്ങളിലൂടെയാണ് ന്യൂസിലൻഡ് സെമി ടിക്കറ്റ് ഉറപ്പിച്ചത്. സൂപ്പർ എട്ടിൽ പാകിസ്താനുമായുള്ള ആദ്യ മത്സരം മഴമൂലം ഉപേക്ഷിച്ചെങ്കിലും ശ്രീലങ്കയ്‌ക്കെതിരെ നേടിയ വിജയം അവർക്ക് തുണയായി. അവസാന മത്സരത്തിൽ ഇംഗ്ലണ്ടിനോട് പരാജയപ്പെട്ടെങ്കിലും പോയിന്റ് പട്ടികയിലെ സ്ഥാനമാണ് കിവികളെ സെമിയിലെത്തിച്ചത്. പ്രകടനത്തിന്റെ കരുത്തിൽ ദക്ഷിണാഫ്രിക്ക മുന്നിലാണെങ്കിലും വലിയ മത്സരങ്ങളിൽ അപ്രതീക്ഷിത തിരിച്ചുവരവ് നടത്താൻ ശേഷിയുള്ളവരാണ് ന്യൂസിലൻഡ്. ഇന്ന് വൈകിട്ട് നടക്കുന്ന മത്സരത്തിൽ ആര് ജയിക്കുമെന്ന ആകാംക്ഷയിലാണ് ക്രിക്കറ്റ് ലോകം.

മത്സരത്തിന് മഴ ഭീഷണിയുണ്ടായാൽ എന്ത് സംഭവിക്കുമെന്ന കാര്യത്തിലും വ്യക്തതയുണ്ട്. സെമി ഫൈനലുകൾക്കും ഫൈനലിനും ഐസിസി റിസർവ് ഡേ അനുവദിച്ചിട്ടുണ്ട്. നിശ്ചിത സമയത്ത് കളി നടന്നില്ലെങ്കിൽ ആദ്യം അധികമായി അനുവദിച്ചിട്ടുള്ള 90 മിനിറ്റ് ഉപയോഗിച്ച് മത്സരം പൂർത്തിയാക്കാൻ ശ്രമിക്കും. അതിനും സാധിച്ചില്ലെങ്കിൽ കളി നിർത്തിവെച്ച ഇടത്തുനിന്ന് വ്യാഴാഴ്ച പുനരാരംഭിക്കും. എന്നാൽ റിസർവ് ദിനത്തിലും മഴ തുടരുകയും മത്സരം പൂർണ്ണമായും ഉപേക്ഷിക്കേണ്ടി വരികയും ചെയ്താൽ സൂപ്പർ എട്ടിലെ പ്രകടനം കണക്കിലെടുത്ത് ദക്ഷിണാഫ്രിക്ക നേരിട്ട് ഫൈനലിലേക്ക് യോഗ്യത നേടും. സൂപ്പർ എട്ടിലെ ഗ്രൂപ്പിൽ ഒന്നാം സ്ഥാനക്കാരായി എത്തിയതാണ് ദക്ഷിണാഫ്രിക്കയ്ക്ക് ഈ ആനുകൂല്യം നൽകുന്നത്.