ഇനിയൊരു ജോൺ സീന ഉണ്ടാകില്ല!; ഐതിഹാസിക റെസ്ലിങ് കരിയറിന് വിരാമം

ഡബ്ല്യുഡബ്ല്യുഇയുടെ ഇതിഹാസ താരം ജോൺ സീന തൻ്റെ ഐതിഹാസിക റെസ്ലിങ് കരിയറിന് വിരാമമിട്ടു. വാഷിങ്ടൺ ഡിസിയിൽ നടന്ന സാറ്റർഡേ നൈറ്റ്‌സ് മെയിൻ ഇവൻ്റ് പോരാട്ടത്തിൽ ഗുന്തറിനോട് തോൽവി വഴങ്ങിയാണ് സീന റിങ്ങിനോട് വിട പറഞ്ഞത്.

ഗുന്തർ സ്ലീപ്പർ ഹോൾഡിലൂടെ സീനയെ കീഴടങ്ങാൻ നിർബന്ധിച്ചതോടെയാണ് മത്സരം അവസാനിച്ചത്. 17 തവണ ലോക ചാമ്പ്യനായ സീനയുടെ 25 വർഷം നീണ്ട കരിയറിൽ ആദ്യമായിട്ടാണ് അദ്ദേഹം റിങ്ങിന് മധ്യത്തിൽ കീഴടങ്ങൽ രേഖപ്പെടുത്തുന്നത് എന്ന സവിശേഷതയും ഈ അവസാന പോരാട്ടത്തിനുണ്ടായി.

കരിയർ റെക്കോർഡുകൾ:

• 17 തവണ ലോക ചാമ്പ്യൻഷിപ്പ് നേടിയ താരം.

• ഡബ്ല്യുഡബ്ല്യുഇ കിരീടം 13 തവണ നേടി.

• ലോക ഹെവിവെയ്റ്റ് ചാമ്പ്യൻഷിപ്പ് മൂന്ന് തവണയും റോയൽ റംബിൾ രണ്ട് തവണയും നേടിയിട്ടുണ്ട്.

• 2000-ൽ റെസ്ലിങ് കരിയർ ആരംഭിച്ച സീന 2002-ലാണ് ഡബ്ല്യുഡബ്ല്യുഇ കമ്പനിയുമായി കരാറിലെത്തുന്നത്.

• സിനിമ, റാപ്പ് സംഗീതം തുടങ്ങിയ മേഖലകളിലും അദ്ദേഹം വ്യക്തിമുദ്ര പതിപ്പിച്ചിട്ടുണ്ട്.

വിടവാങ്ങൽ ടൂർണമെൻ്റ്:

റോ, സ്മാക്ക്ഡൗൺ, എൻഎക്സ്ടി താരങ്ങൾ പങ്കെടുത്ത 16 പേരടങ്ങിയ 'ലാസ്റ്റ് ടൈം ഈസ് നൗ' ടൂർണമെൻ്റിൻ്റെ ഫൈനൽ മത്സരം കൂടിയായിരുന്നു ഇത്. ഫൈനലിൽ എൽഎ നൈറ്റിനെ വീഴ്ത്തിയാണ് ഗുന്തർ സീനയുമായുള്ള മത്സരത്തിന് അവസരം നേടിയത്.

2025-ൽ സജീവ റെസ്ലർ കരിയർ അവസാനിപ്പിക്കുമെന്ന് സീന നേരത്തെ പ്രഖ്യാപിച്ചിരുന്നു, ഇതിൻ്റെ ഭാഗമായി വിടവാങ്ങൽ ടൂറും അദ്ദേഹം സംഘടിപ്പിച്ചു.

ഡബ്ല്യുഡബ്ല്യുഇയുടെ പ്രതികരണം:

വിരമിക്കലിന് പിന്നാലെ ഡബ്ല്യുഡബ്ല്യുഇ തങ്ങളുടെ സമൂഹ മാധ്യമങ്ങളിൽ ഇങ്ങനെ കുറിച്ചു: "ദി 'ഗോട്ട്' (ഗ്രേറ്റസ്റ്റ് ഓഫ് ഓൾ ടൈം), ഇനിയൊരു ജോൺ സീന ഉണ്ടാകില്ല!"