കെസിഎൽ ആവേശത്തിൽ തൃശൂർ; ട്രോഫി ടൂർ വാഹനത്തിന് ഉജ്ജ്വല സ്വീകരണം
കേരള ക്രിക്കറ്റ് ലീഗിന്റെ ആവേശം നെഞ്ചിലേറ്റി സാംസ്കാരിക തലസ്ഥാനം. കെസിഎൽ രണ്ടാം സീസണിന് മുന്നോടിയായുള്ള ട്രോഫി ടൂർ വാഹന പര്യടനം ജില്ലയിൽ പ്രവേശിച്ചു. ഉഷ്മള വരവേൽപ്പാണ് ജില്ലയിലെ കായിക പ്രേമികളും വിദ്യാർത്ഥികളും പൊതു സമൂഹവും ആദ്യ ദിനം നൽകിയത്. കെസിഎയുടെ ആഭിമുഖ്യത്തിൽ കണ്ണൂർ മുതൽ തിരുവനന്തപുരം വരെ നടക്കുന്ന ട്രോഫി ടൂർ വാഹനം നാലു ദിവസമാണ് ജില്ലയിൽ പര്യടനം നടത്തുക. ഇതിലൂടെ തൃശൂരിന്റെ നഗര-ഗ്രാമ മേഖലകളിൽ ക്രിക്കറ്റിന്റെ ആവേശം അലയടിക്കും. തൃശൂരിന്റെ സ്വന്തം ടീമായ ഫിനസ്സ് തൃശൂർ ടൈറ്റൻസും പ്രചാരണ പരിപാടികളുടെ ഭാഗമാണ്.
പര്യടനത്തിന്റെ ജില്ലാതല ഉദ്ഘാടനം പാവറട്ടി സിഎംഐ പബ്ലിക് സ്കൂളിൽ നടന്നു. സ്കൂൾ മാനേജർ ഫാ. ജോസഫ് ആലപ്പാട്ട് സിഎംഐ, ഹെഡ്മാസ്റ്റർ പി.എഫ്. ജോസ്, പാവറട്ടി പഞ്ചായത്ത് പ്രസിഡന്റ് റെജീന എം.എം, കായികാധ്യാപകരായ ജോബി ജോസ്, സജിത്ത് ജോർജ്, തൃശൂർ ഡിസ്ട്രിക്റ്റ് ക്രിക്കറ്റ് അസോസിയേഷൻ എക്സിക്യൂട്ടീവ് മെമ്പർ ആനന്ദ്, ഫാ. പ്രവീൺ എന്നിവർ ചേർന്ന് പര്യടന വാഹനം ഫ്ലാഗ് ഓഫ് ചെയ്തു. വിദ്യാർത്ഥികളും ക്രിക്കറ്റ് പ്രേമികളും ചേർന്ന് ആവേശോജ്ജ്വലമായ സ്വീകരണമാണ് ട്രോഫിക്കും പര്യടന വാഹനത്തിനും നൽകിയത്. ഉദ്ഘാടനത്തിന് ശേഷം ഇന്ന് പൂവത്തൂർ, ഐഇഎസ് എഞ്ചിനീയറിംഗ് കോളേജ്, കാഞ്ഞാണി എന്നിവിടങ്ങളിലും വിവിധ പരിപാടികൾ അരങ്ങേറി. ഓരോ കേന്ദ്രത്തിലും വിദ്യാർത്ഥികളെയും പൊതുജനങ്ങളെയും പങ്കെടുപ്പിച്ച് വിവിധ മത്സരങ്ങളും സംഘടിപ്പിച്ചു. എല്ലായിടത്തും വലിയ ആവേശത്തോടെയാണ് ആരാധകർ പരിപാടിയിൽ പങ്കെടുത്തത്.
വരും ദിവസങ്ങളിലും പര്യടനം ജില്ലയിലെ പ്രമുഖ കേന്ദ്രങ്ങളിലൂടെ കടന്നുപോകും. ചൊവ്വാഴ്ച റോയൽ കോളേജ്, തേജസ് കോളേജ്, വിദ്യ കോളേജ്, ശോഭ മാൾ എന്നിവിടങ്ങളിലും, ബുധനാഴ്ച ശക്തൻ ബസ് സ്റ്റാൻഡ്, കേരള വർമ്മ കോളേജ്, ബിനി ഹെറിറ്റേജ് ജംഗ്ഷൻ, ഹൈലൈറ്റ് മാൾ എന്നിവിടങ്ങളിലും പര്യടനം എത്തും. പര്യടനത്തിന്റെ അവസാന ദിനമായ വ്യാഴാഴ്ച ചേതന കോളേജ്, ഗവ. എഞ്ചിനീയറിംഗ് കോളേജ്, വിമല കോളേജ് തുടങ്ങിയ വിദ്യാഭ്യാസ സ്ഥാപനങ്ങൾ സന്ദർശിച്ച ശേഷം ചാലക്കുടി ഓട്ടോ സ്റ്റാൻഡിൽ സമാപിക്കും.