ആധാർ ഇനി വാട്‌സ്ആപ്പിലും; ഡിജിലോക്കർ വഴി രേഖകൾ ഡൗൺലോഡ് ചെയ്യാൻ പുത്തൻ സൗകര്യം

സർക്കാർ സേവനങ്ങൾ ജനങ്ങളിലേക്ക് വേഗത്തിൽ എത്തിക്കുന്നതിന്റെ ഭാഗമായി, ആധാർ കാർഡും പാൻ കാർഡും ഉൾപ്പെടെയുള്ള പ്രധാന രേഖകൾ വാട്‌സ്ആപ്പിലൂടെ ഡൗൺലോഡ് ചെയ്യാനുള്ള സൗകര്യം കേന്ദ്ര സർക്കാർ സജ്ജമാക്കി. മൈഗവ് ഹെൽപ്പ്‌ഡെസ്ക് (MyGov Helpdesk) ചാറ്റ്‌ബോട്ട് വഴിയാണ് ഈ സേവനം ലഭ്യമാകുക. യു.ഐ.ഡി.എ.ഐ (UIDAI) പോർട്ടലിലെ തിരക്കോ കാപ്‌ച കോഡുകളുടെ നൂലാമാലകളോ ഇല്ലാതെ തന്നെ 24 മണിക്കൂറും ലളിതമായി ഈ സേവനം പ്രയോജനപ്പെടുത്താം.

വാട്‌സ്ആപ്പിലൂടെ ആധാർ ലഭിക്കുന്നതിനായി ഉപഭോക്താക്കൾ ആദ്യം +91-9013151515 എന്ന നമ്പർ ഫോണിൽ സേവ് ചെയ്യണം. തുടർന്ന് വാട്‌സ്ആപ്പ് തുറന്ന് ഈ നമ്പറിലേക്ക് "Hi" അല്ലെങ്കിൽ "Namaste" എന്ന് സന്ദേശം അയക്കുക. ചാറ്റ്‌ബോട്ട് നൽകുന്ന ഓപ്ഷനുകളിൽ നിന്ന് "DigiLocker Services" എന്നത് തിരഞ്ഞെടുക്കുക. ഡിജിലോക്കർ അക്കൗണ്ട് ഉള്ളവർക്ക് 'Yes' നൽകി മുന്നോട്ട് പോകാം. അക്കൗണ്ട് ഇല്ലാത്തവർക്ക് ഡിജിലോക്കർ വെബ്‌സൈറ്റ് വഴിയോ ആപ്പ് വഴിയോ നേരത്തെ അക്കൗണ്ട് തുടങ്ങാവുന്നതാണ്. വെരിഫിക്കേഷനായി നിങ്ങളുടെ 12 അക്ക ആധാർ നമ്പർ നൽകിയാൽ ബന്ധിപ്പിച്ചിട്ടുള്ള മൊബൈൽ നമ്പറിലേക്ക് ഒ.ടി.പി വരും.

ഒ.ടി.പി നൽകി വെരിഫിക്കേഷൻ പൂർത്തിയായാൽ ഡിജിലോക്കറിലുള്ള രേഖകളുടെ പട്ടിക ചാറ്റിൽ തെളിയും. ഇതിൽ നിന്ന് 'Aadhaar' തിരഞ്ഞെടുത്താൽ ഉടൻ തന്നെ ആധാർ കാർഡിന്റെ പി.ഡി.എഫ് ഫോർമാറ്റ് ലഭ്യമാകും. ഇതേ രീതിയിൽ തന്നെ പാൻ കാർഡ്, ഡ്രൈവിങ് ലൈസൻസ് തുടങ്ങിയ രേഖകളും ഡൗൺലോഡ് ചെയ്യാവുന്നതാണ്. വാട്‌സ്ആപ്പിലൂടെ ലഭിക്കുന്ന ഈ പി.ഡി.എഫ് ഡിജിറ്റൽ ഒപ്പുള്ളതായതിനാൽ അസ്സൽ രേഖയ്ക്ക് തുല്യമായ നിയമസാധുത ഇതിനുണ്ടാകും. ആധാറുമായി ബന്ധിപ്പിച്ച മൊബൈൽ നമ്പർ തന്നെയായിരിക്കണം ഈ സേവനത്തിനായി ഉപയോഗിക്കേണ്ടത്.