ലോകത്തിലെ ആദ്യ ന്യൂക്ലിയർ ക്ലോക്ക് വികസിപ്പിച്ച് ഓസ്ട്രിയൻ, ചൈനീസ് ശാസ്ത്രജ്ഞർ

ലോകത്തിലെ ആദ്യത്തെ പ്രവർത്തനക്ഷമമായ ന്യൂക്ലിയർ ക്ലോക്ക് ഓസ്ട്രിയയിലെയും ചൈനയിലെയും ശാസ്ത്രജ്ഞർ ചേര്‍ന്ന് വികസിപ്പിച്ചു. വിയന്നയിലെ ടിയു വിയെൻ (TU Wien), ബെയ്ജിങ്ങിലെ സിൻഹുവ സർവകലാശാല എന്നിവടങ്ങളിലെ ഗവേഷകർ നടത്തിയ ഈ നിർണായക നേട്ടം പ്രശസ്ത ശാസ്ത്ര മാസികയായ 'നേച്ചറിൽ' പ്രസിദ്ധീകരിച്ചു. ഇലക്ട്രോണുകളുടെ ചലനത്തിന് പകരം ആറ്റോമിക് ന്യൂക്ലിയസിനുള്ളിലെ മാറ്റങ്ങൾ ഉപയോഗിച്ച് സമയം അളക്കുന്ന ലോകത്തെ ആദ്യ സാങ്കേതികവിദ്യയാണിത്.

തോറിയം-229 (Thorium-229) എന്ന റേഡിയോ ആക്ടീവ് ഐസോടോപ്പിൽ അൾട്രാ വയലറ്റ് ലേസർ ഉപയോഗിച്ച് നടത്തുന്ന സൂക്ഷ്മ പ്രവർത്തനങ്ങളാണ് ഇതിൽ സമയം അളക്കാൻ ഉപയോഗിക്കുന്നത്. ഇലക്ട്രോണുകളുടെ ഊർജ്ജ നിലകളെ ആശ്രയിക്കുന്ന നിലവിലെ ആറ്റോമിക് ക്ലോക്കുകളെ അപേക്ഷിച്ച്, ബാഹ്യമായ തടസ്സങ്ങൾ ബാധിക്കാത്ത ആറ്റോമിക് ന്യൂക്ലിയസിനുള്ളിലെ മാറ്റങ്ങൾ ഉപയോഗിക്കുന്നതിനാൽ ഈ ന്യൂക്ലിയർ ക്ലോക്കുകൾക്ക് അസാധാരണ കൃത്യത ഉറപ്പാക്കാനാകും.