മൊബൈൽ റേഡിയേഷൻ പരിധി ഉയർത്തി കേന്ദ്രം: 5ജി സേവനം ഇനി കൂടുതൽ വേഗത്തിലും മികച്ച കവറേജിലും ലഭിക്കും

ഇന്ത്യയിലെ മൊബൈൽ നെറ്റ്‌വർക്കുകൾക്കുള്ള ഇലക്ട്രോമാഗ്നറ്റിക് ഫീൽഡ് (EMF) അഥവാ റേഡിയേഷൻ പരിധി കേന്ദ്രസർക്കാർ ഇരട്ടിയാക്കി വർധിപ്പിച്ചു. നിലവിലുള്ള 5 വാട്ട് പെർ സ്ക്വയർ മീറ്റർ എന്ന പരിധിയാണ് അന്താരാഷ്ട്ര നിലവാരത്തിന് തുല്യമായി 10 വാട്ടാക്കി ഉയർത്തുന്നത്. രാജ്യത്ത് 5ജി ട്രാഫിക് കുത്തനെ വർധിക്കുന്ന സാഹചര്യത്തിൽ തടസ്സമില്ലാത്ത സേവനം ഉറപ്പാക്കുകയാണ് ഈ തീരുമാനത്തിന്റെ പ്രധാന ലക്ഷ്യം. അടുത്ത മാസം മുതൽ പുതിയ ഉത്തരവ് പ്രാബല്യത്തിൽ വരുമെന്ന് ഇക്കണോമിക് ടൈംസ് റിപ്പോർട്ട് ചെയ്തു. റേഡിയേഷൻ പരിധി ഉയർത്തുന്നതോടെ കൂടുതൽ ദൂരത്തിലേക്ക് സിഗ്നലുകൾ എത്തിക്കാൻ സാധിക്കും. ഇത് ടവറുകളുടെ കവറേജ് വിസ്തൃതി വർധിപ്പിക്കുകയും പുതിയ ടവറുകൾ സ്ഥാപിക്കുന്നതിനായുള്ള ഭീമമായ ചെലവ് കുറയ്ക്കാൻ ടെലികോം കമ്പനികളെ സഹായിക്കുകയും ചെയ്യും. ദീർഘകാലമായി ടെലികോം ഓപ്പറേറ്റർമാർ ഉന്നയിക്കുന്ന പ്രധാന ആവശ്യങ്ങളിലൊന്നാണിത്.

നോൺ-അയണൈസിങ് റേഡിയേഷൻ പ്രൊട്ടക്ഷനായുള്ള ഇന്റർനാഷണൽ കമ്മീഷൻ (ICNIRP) ശുപാർശ ചെയ്യുന്ന ആഗോള മാനദണ്ഡമായ 10 വാട്ടിലേക്കാണ് ഇന്ത്യയും ഇപ്പോൾ മാറിയിരിക്കുന്നത്. മുൻപ് ഇന്ത്യയിൽ 1 വാട്ട് ആയിരുന്ന റേഡിയേഷൻ പരിധി കഴിഞ്ഞ വർഷമാണ് 5 വാട്ടാക്കി ഉയർത്തിയത്. നിലവിലെ മാറ്റത്തോടെ യുകെ, ജപ്പാൻ, സിംഗപ്പൂർ തുടങ്ങി 137 രാജ്യങ്ങളുടെ തത്തുല്യ നിലവാരത്തിലേക്ക് ഇന്ത്യയും എത്തിച്ചേർന്നു. റിലയൻസ് ജിയോ, ഭാരതി എയർടെൽ, വൊഡാഫോൺ ഐഡിയ (Vi) എന്നീ കമ്പനികൾക്ക് ഈ തീരുമാനം വലിയ നേട്ടമാകും. 5ജി സേവനങ്ങൾ വിപുലീകരിക്കാൻ ഒരുങ്ങുന്ന വൊഡാഫോൺ ഐഡിയയ്ക്ക് തുടക്കം മുതൽ തന്നെ ചെലവ് കുറഞ്ഞ രീതിയിൽ നെറ്റ്‌വർക്ക് ആസൂത്രണം ചെയ്യാൻ ഇത് സഹായിക്കും. നിലവിൽ രാജ്യവ്യാപകമായി 5ജി സേവനം ലഭ്യമാക്കിയ ജിയോ, എയർടെൽ കമ്പനികൾക്ക് തങ്ങളുടെ നിലവിലുള്ള സൈറ്റുകളിൽ നിന്ന് തന്നെ കൂടുതൽ ശക്തവും വേഗമേറിയതുമായ സേവനം നൽകാനും സാധിക്കും.

2G, 3G, 4G സാങ്കേതികവിദ്യകളിൽ ഉപയോഗിച്ചിരുന്ന EMF നിയന്ത്രണങ്ങൾ 5ജിയുടെ പ്രവർത്തനത്തിന് പര്യാപ്തമല്ലെന്ന് ടെലികോം കമ്പനികൾ വ്യക്തമാക്കുന്നു. വർധിച്ചുവരുന്ന 5ജി ട്രാഫിക് സുഗമമായി കൈകാര്യം ചെയ്യാനും അന്താരാഷ്ട്ര തലത്തിലുള്ള വേഗത ഉപഭോക്താക്കൾക്ക് ലഭ്യമാക്കാനും ഈ മാറ്റം അത്യന്താപേക്ഷിതമാണെന്ന് അധികൃതർ ചൂണ്ടിക്കാട്ടുന്നു.