പ്രോംപ്റ്റ് ഇൻജക്ഷൻ വഴി ഇനി ഡേറ്റ മോഷ്ടിക്കാനാകില്ല; ChatGPT-ൽ ലോക്ഡൗൺ മോഡുമായി ഓപ്പൺഎഐ
ചാറ്റ് ജിപിടി ഉപയോക്താക്കളുടെ അക്കൗണ്ട് സുരക്ഷ വർദ്ധിപ്പിക്കുന്നതിനും ഡേറ്റാ മോഷണം തടയുന്നതിനുമായി പുത്തൻ പ്രതിരോധ സംവിധാനവുമായി ഓപ്പൺഎഐ. 'പ്രോംപ്റ്റ് ഇൻജക്ഷൻ' (Prompt Injection) സൈബർ ആക്രമണങ്ങളെ ചെറുക്കാൻ ലക്ഷ്യമിട്ടുള്ള 'ലോക്ഡൗൺ മോഡ്' (Lockdown Mode) ഫീച്ചറാണ് കമ്പനി ഇപ്പോൾ ഔദ്യോഗികമായി അവതരിപ്പിച്ചിരിക്കുന്നത്.
വിലപ്പെട്ടതും അതീവ രഹസ്യവുമായ വിവരങ്ങൾ കൈകാര്യം ചെയ്യുന്ന ഉപയോക്താക്കൾക്ക് ഏറെ പ്രയോജനം ചെയ്യുന്നതാണ് ഈ സുരക്ഷാ ഫീച്ചർ. കഴിഞ്ഞ ഫെബ്രുവരിയിൽ വലിയ കമ്പനികൾക്കായുള്ള എന്റർപ്രൈസ് പ്ലാനുകളിൽ മാത്രം പരീക്ഷണാടിസ്ഥാനത്തിൽ അവതരിപ്പിച്ച ഈ ഫീച്ചർ, ഇനി മുതൽ സൗജന്യ ഉപയോക്താക്കൾക്കും ഗോ, പ്ലസ്, പ്രോ, സെൽഫ്-സർവ് ബിസിനസ് പ്ലാനുകൾ ഉപയോഗിക്കുന്നവർക്കും ലഭ്യമാകും.
എന്താണ് പ്രോംപ്റ്റ് ഇൻജക്ഷൻ ആക്രമണം?
ചാറ്റ്ബോട്ടുകളെയും ആർട്ടിഫിഷ്യൽ ഇന്റലിജൻസ് സംവിധാനങ്ങളെയും ലക്ഷ്യമിട്ട് ഹാക്കർമാർ നടത്തുന്ന ഒരുതരം സോഷ്യൽ എഞ്ചിനീയറിംഗ് രീതിയാണിത്. ഹാക്കർമാർ വെബ്പേജുകളിലോ, ഡോക്യുമെന്റുകളിലോ അല്ലെങ്കിൽ എഐ സ്കാൻ ചെയ്യാൻ സാധ്യതയുള്ള മറ്റ് ഫയലുകളിലോ ഉപയോക്താവിന് ദോഷകരമായ രഹസ്യ നിർദ്ദേശങ്ങൾ (ഹാനികരമായ പ്രോംപ്റ്റുകൾ) ഒളിപ്പിച്ചു വെക്കുന്നു. എഐ മോഡൽ ഈ ഫയലുകൾ വായിക്കുമ്പോൾ ഹാക്കറുടെ നിർദ്ദേശം അനുസരിക്കുകയും, ഉപയോക്താവിന്റെ ചാറ്റിലെ മുൻകാല വിവരങ്ങളോ വ്യക്തിഗത ഡേറ്റയോ ചോർത്തി ഹാക്കർക്ക് കൈമാറുകയും ചെയ്യുന്നു.
എന്നാൽ ഈ പ്രശ്നം പൂർണ്ണമായി പരിഹരിക്കാനല്ല, മറിച്ച് ശക്തമായൊരു പ്രതിരോധ മാർഗ്ഗമായാണ് ഓപ്പൺഎഐ ലോക്ഡൗൺ മോഡ് ഡിസൈൻ ചെയ്തിരിക്കുന്നത്. ഈ മോഡ് ഓൺ ആണെങ്കിലും ഫയലുകളിലെ പ്രോംപ്റ്റ് ഇൻജക്ഷനുകൾ ചാറ്റ് ജിപിടി സ്കാൻ ചെയ്യുന്നത് തടയില്ല. പക്ഷേ, ആക്രമണകാരിക്ക് നിങ്ങളുടെ അക്കൗണ്ടിൽ നിന്ന് വിവരങ്ങൾ പുറത്തേക്ക് കടത്തുന്നത് (മോഷണം) ഇത് പൂർണ്ണമായും അസാധ്യമാക്കും.
ലോക്ഡൗൺ മോഡ് ഓൺ ചെയ്താൽ സംഭവിക്കുന്നത്:
ഈ സുരക്ഷാ മോഡ് ആക്ടിവേറ്റ് ചെയ്യുന്നതോടെ ചാറ്റ് ജിപിടിയുടെ പുറംലോകവുമായുള്ള ചില ഡിജിറ്റൽ ഇടപെടലുകൾക്ക് കർശന നിയന്ത്രണം വരും:
- പരിമിതമായ ബ്രൗസിങ്: ചാറ്റ് ജിപിടിയുടെ ലൈവ് വെബ് ബ്രൗസിങ് സംവിധാനം പരിമിതപ്പെടുത്തും.
- ഫീച്ചറുകൾ ഓഫാകും: ആഴത്തിലുള്ള വിവരശേഖരണത്തിനായുള്ള 'ഡീപ് റിസർച്ച്', 'ഏജന്റ് മോഡ്' എന്നിവ പൂർണ്ണമായും ഓഫാകും.
- ഡൗൺലോഡ് തടയും: ചാറ്റിൽ നിന്നുള്ള ഫയൽ ഡൗൺലോഡുകൾ തടയും.
- ലഭ്യമാകുന്നവ: അതേസമയം ഇമേജ് ജനറേഷൻ (DALL-E), നേരിട്ടുള്ള ഫയൽ അപ്ലോഡുകൾ എന്നിവ സാധാരണ പോലെ പ്രവർത്തിക്കും. ചാറ്റ് ജിപിടിയുടെ മെമ്മറി ഫീച്ചറിലും മാറ്റമുണ്ടാകില്ല.
ആക്ടീവ് സെഷൻ മാനേജരും ലഭ്യമാകും
പുതിയ സുരക്ഷാ ഫീച്ചറിനൊപ്പം ഒരു 'ആക്ടീവ് സെഷൻ മാനേജരും' ഉപയോക്താക്കൾക്ക് ലഭിക്കും. നിങ്ങളുടെ അക്കൗണ്ട് ലോഗിൻ ചെയ്തിട്ടുള്ള എല്ലാ മൊബൈലുകളുടെയും കമ്പ്യൂട്ടറുകളുടെയും ബ്രൗസറുകളുടെയും കൃത്യമായ ലിസ്റ്റ് ഇതിൽ കാണാം. സംശയകരമായ ലോഗിനുകൾ ശ്രദ്ധയിൽപ്പെട്ടാൽ ഉപയോക്താക്കൾക്ക് ഒറ്റ ക്ലിക്കിലൂടെ എല്ലാ ഉപകരണങ്ങളിൽ നിന്നും ഒരേസമയം ലോഗ് ഔട്ട് ചെയ്യാനുള്ള സൗകര്യവും ഇതിലുണ്ട്. ലോക്ഡൗൺ മോഡ് എല്ലാ സാധാരണ ഉപയോക്താക്കൾക്കും നിർബന്ധമല്ലെന്നും, അതീവ സുരക്ഷ ആവശ്യമുള്ളവർ മാത്രം ഉപയോഗിച്ചാൽ മതിയെന്നും കമ്പനി വ്യക്തമാക്കിയിട്ടുണ്ട്.