മെറ്റയുടെ റേ-ബാൻ സ്മാർട്ട് ഗ്ലാസിന് പൂട്ടിടാൻ ഗൂഗിൾ; അണിയറയിൽ പുത്തൻ 'ഓഡിയോ ഗ്ലാസുകൾ'

വിപണിയിൽ തരംഗം സൃഷ്ടിച്ച മെറ്റയുടെ റേ-ബാൻ സ്മാർട്ട് ഗ്ലാസുകൾക്ക് കടുത്ത വെല്ലുവിളിയുമായി ആഗോള ടെക് ഭീമന്മാരായ ഗൂഗിൾ. അത്യാധുനിക ഫീച്ചറുകൾ ഉൾക്കൊള്ളിച്ചുകൊണ്ടുള്ള തങ്ങളുടെ പുത്തൻ 'ഓഡിയോ ഗ്ലാസുകൾ' ഗൂഗിൾ ഔദ്യോഗികമായി പ്രഖ്യാപിച്ചു. ഇൻബിൽറ്റായ മൈക്രോഫോൺ, പ്രീമിയം ക്യാമറ, സ്പീക്കർ സംവിധാനങ്ങൾ എന്നിവ കൃത്യമായി സമന്വയിപ്പിച്ചാണ് ഗൂഗിൾ സ്മാർട്ട് ഗ്ലാസുകൾ രൂപകൽപ്പന ചെയ്തിരിക്കുന്നത്.

വളരെ ലളിതമായി ധരിക്കാൻ സാധിക്കുന്ന ഈ ഗ്ലാസുകൾ വഴി ഉപയോക്താക്കൾക്ക് തടസ്സമില്ലാതെ ഫോൺ കോളുകൾ ചെയ്യാനും, പ്രിയപ്പെട്ട സംഗീതം ആസ്വദിക്കാനും, ഫോട്ടോകളും വിഡിയോകളും പകർത്താനും സാധിക്കും. ഇതിനെല്ലാപ്പുറമെ ഗൂഗിളിന്റെ ഏറ്റവും പുതിയ ജെമിനി എ.ഐ അസിസ്റ്റന്റുമായി നേരിട്ട് വോയിസ് ചാറ്റ് ചെയ്യാനുള്ള സൗകര്യവും ഈ സ്മാർട്ട് ഗ്ലാസുകളിലുണ്ട്. സ്മാർട്ട് ഗ്ലാസ് രംഗത്ത് കഴിഞ്ഞ പത്തുവർഷത്തിലധികമായി ഗൂഗിൾ നടത്തിവന്ന കഠിനശ്രമങ്ങളാണ് ഇതോടെ ലക്ഷ്യം കണ്ടിരിക്കുന്നത്.

സാംസങ്ങുമായി കൈകോർത്ത് ഗൂഗിൾ; ആൻഡ്രോയിഡിലും ഐഫോണിലും കണക്ട് ചെയ്യാം

കാലിഫോർണിയയിലെ മൗണ്ടൻ വ്യൂ ആസ്ഥാനത്ത് നടന്ന പ്രമുഖ ഗൂഗിൾ ഡെവലപ്പർ കോൺഫറൻസിലാണ് ഈ ഓഡിയോ ഗ്ലാസിന്റെ ആദ്യരൂപം കമ്പനി അനാച്ഛാദനം ചെയ്തത്. പ്രമുഖ അന്താരാഷ്ട്ര ബ്രാൻഡായ സാംസങ് ആണ് ഈ സ്മാർട്ട് ഗ്ലാസിന്റെ ഹാർഡ്‌വെയർ, സാങ്കേതിക രംഗത്തെ നിർണ്ണായക പ്രവർത്തനങ്ങൾ കൈകാര്യം ചെയ്തിരിക്കുന്നത് എന്നാണ് പുറത്തുവരുന്ന വിവരങ്ങൾ. ഗൂഗിൾ ഓഡിയോ ഗ്ലാസുകൾ ആൻഡ്രോയിഡ് (Android) ഫോണുകൾക്ക് പുറമെ ആപ്പിൾ ഐഫോണുകളുമായും (iOS) സുഗമമായി പൊരുത്തപ്പെടുന്നവയായിരിക്കുമെന്ന് ഗൂഗിൾ വ്യക്തമാക്കിയിട്ടുണ്ട്. ഈ സ്മാർട്ട് ഗ്ലാസുകൾ ഈ വർഷം അവസാനത്തോടെ ആഗോള വിപണിയിൽ എത്തിയേക്കുമെന്നാണ് പ്രമുഖ ടെക് വിദഗ്ദ്ധർ വിലയിരുത്തുന്നത്. അതേസമയം, ഒദ്യോഗികമായി വിപണിയിലെത്തുന്ന തീയതിയോ ഇതിന്റെ കൃത്യമായ വിലയോ ഗൂഗിൾ ഇതുവരെ പുറത്തുവിട്ടിട്ടില്ല.

പഴയ പരാജയത്തിൽ നിന്നുള്ള ശക്തമായ തിരിച്ചുവരവ്

ഗൂഗിളിന്റെ ചരിത്രത്തിലെ ഏറ്റവും വലിയ പരാജയങ്ങളിലൊന്നായി വിലയിരുത്തപ്പെട്ട ‘ഗൂഗിൾ ഗ്ലാസ്’ 2013-ൽ ഇന്റഗ്രേറ്റഡ് ക്യാമറയോടെ വിപണിയിൽ എത്തിയിരുന്നു. എന്നാൽ സ്വകാര്യതാ പ്രശ്നങ്ങളും ഉയർന്ന വിലയും ഡിസൈനിലെ പോരായ്മകളും കാരണം ആ പ്രോജക്ട് പിന്നീട് കമ്പനിക്ക് പൂർണ്ണമായി ഉപേക്ഷിക്കേണ്ടി വന്നു. അതിനുശേഷം ഏറെക്കാലമായി സ്മാർട്ട് ഗ്ലാസ് രംഗത്ത് മെറ്റയുടെ റേ-ബാൻ ഗ്ലാസുകൾക്കായിരുന്നു വിപണിയിൽ കുത്തകയുണ്ടായിരുന്നത്. ആ ആശങ്കകളെല്ലാം മറികടന്ന്, മെറ്റയുടെ കുത്തക തകർക്കുന്ന വലിയൊരു വിജയമായി പുതിയ ഓഡിയോ ഗ്ലാസ് മാറുമെന്ന കടുത്ത പ്രതീക്ഷയിലാണ് ഗൂഗിൾ.