ചന്ദ്രനിലേക്ക് വീണ്ടും മനുഷ്യൻ; ആർട്ടെമിസ് II ചരിത്രക്കുതിപ്പിന് തയ്യാറെടുക്കുന്നു

അരനൂറ്റാണ്ടിന്റെ നീണ്ട കാത്തിരിപ്പിന് വിരാമമിട്ട് മനുഷ്യൻ വീണ്ടും ചന്ദ്രനിലേക്ക്. നാസയുടെ ആർട്ടെമിസ് II (Artemis II) ദൗത്യം ഏപ്രിൽ ആദ്യവാരത്തിൽ വിക്ഷേപിക്കുമെന്ന് നാസ ഔദ്യോഗികമായി അറിയിച്ചു. 1972-ലെ അപ്പോളോ 17 ദൗത്യത്തിന് ശേഷം ആദ്യമായാണ് ഒരു സംഘം ബഹിരാകാശ യാത്രികർ ചന്ദ്രനെ ലക്ഷ്യമാക്കി കുതിക്കുന്നത്. മനുഷ്യരാശിയുടെ ബഹിരാകാശ പര്യവേഷണ ചരിത്രത്തിൽ പുതിയൊരു നാഴികക്കല്ലായി മാറുന്ന ഈ ദൗത്യം, ഭാവിയിലെ ചൊവ്വാ യാത്രകൾക്കുള്ള മുന്നൊരുക്കം കൂടിയാണെന്ന് നാസ വിലയിരുത്തുന്നു.

2026 ഏപ്രിൽ ഒന്നിന് വിക്ഷേപണത്തിനുള്ള ലോഞ്ച് വിൻഡോ തുറക്കാനാണ് നിലവിൽ പദ്ധതിയിട്ടിരിക്കുന്നത്. കാലാവസ്ഥാ സാഹചര്യങ്ങൾ പരിഗണിച്ചായിരിക്കും കൃത്യമായ തീയതി നിശ്ചയിക്കുക. ഏകദേശം 10 ദിവസം നീണ്ടുനിൽക്കുന്ന ദൗത്യത്തിൽ നാല് ബഹിരാകാശ യാത്രികരാണ് ഉൾപ്പെടുന്നത്. ചന്ദ്രനെ ചുറ്റി സഞ്ചരിച്ച ശേഷം സംഘം സുരക്ഷിതമായി ഭൂമിയിൽ തിരിച്ചെത്തും. കെന്നഡി സ്‌പേസ് സെന്ററിലെ ലോഞ്ച് കോംപ്ലക്‌സ് 39ബിയിൽ നിന്ന് നാസയുടെ ഏറ്റവും കരുത്തുറ്റ റോക്കറ്റായ സ്‌പേസ് ലോഞ്ച് സിസ്റ്റം (SLS) ഉപയോഗിച്ചാണ് വിക്ഷേപണം നടക്കുക.

റീഡ് വൈസ്മാൻ കമാൻഡറായ ദൗത്യത്തിൽ പൈലറ്റായി വിക്ടർ ഗ്ലോവറും മിഷൻ സ്പെഷ്യലിസ്റ്റുകളായി ക്രിസ്റ്റീന കോച്ച്, ജെറമി ഹാൻസെൻ എന്നിവരും അണിനിരക്കും. എസ്.എൽ.എസ് റോക്കറ്റ് വഹിക്കുന്ന ഓറിയോൺ ബഹിരാകാശ പേടകത്തിലായിരിക്കും ഇവരുടെ യാത്ര. ദീർഘകാല ബഹിരാകാശ യാത്രകൾക്ക് ആവശ്യമായ ജീവൻ രക്ഷാ സംവിധാനങ്ങൾ, ഡീപ് സ്പേസ് നാവിഗേഷൻ, റേഡിയേഷൻ എക്സ്പോഷർ എന്നിവയെക്കുറിച്ച് പഠിക്കുകയാണ് ദൗത്യത്തിന്റെ പ്രധാന ലക്ഷ്യം. എൻജിനീയറിങ് വിഭാഗം എല്ലാ അറ്റകുറ്റപ്പണികളും പൂർത്തിയാക്കി വിക്ഷേപണത്തിനായുള്ള അന്തിമ തയ്യാറെടുപ്പിലാണ്.

English Slug: NASA's Artemis II mission set to launch in early April 2026; Humans to orbit the Moon after 50 years.