വായിച്ചുകഴിഞ്ഞാൽ സന്ദേശങ്ങൾ അപ്രത്യക്ഷമാകും; വാട്‌സ്ആപ്പിൽ വരുന്നു 'ആഫ്റ്റർ റീഡിങ്' ഫീച്ചർ

ഉപയോക്താക്കളുടെ സ്വകാര്യതയ്ക്ക് കൂടുതൽ കരുത്തേകാൻ പുത്തൻ ഫീച്ചറുമായി വാട്‌സ്ആപ്പ്. സന്ദേശങ്ങൾ വായിച്ചുകഴിഞ്ഞാൽ നിശ്ചിത സമയത്തിനുള്ളിൽ തനിയെ ഡിലീറ്റ് ചെയ്യപ്പെടുന്ന 'ആഫ്റ്റർ റീഡിങ്' (After Reading) എന്ന സംവിധാനമാണ് വാട്‌സ്ആപ്പ് അവതരിപ്പിക്കുന്നത്. അതീവ സുരക്ഷാ പ്രാധാന്യമുള്ള വിവരങ്ങൾ കൈമാറാൻ ഈ ഫീച്ചർ ഏറെ സഹായകമാകുമെന്നാണ് വിലയിരുത്തൽ.

പുതിയ ഫീച്ചർ പ്രകാരം, ഒരു സന്ദേശം തുറന്നു കഴിഞ്ഞാൽ ഉടൻ തന്നെ 15 മിനിറ്റിന്റെ കൗണ്ട് ഡൗൺ ആരംഭിക്കും. ഈ സമയം പൂർത്തിയായാൽ സന്ദേശം അയച്ചയാളുടെയും സ്വീകരിച്ചയാളുടെയും ഫോണുകളിൽ നിന്ന് അത് ഓട്ടോമാറ്റിക്കായി നീക്കം ചെയ്യപ്പെടും. എന്നാൽ സന്ദേശം തുറന്നു നോക്കിയില്ലെങ്കിൽ 24 മണിക്കൂർ വരെ അത് ചാറ്റിൽ തുടരും, അതിനുശേഷം തനിയെ അപ്രത്യക്ഷമാകും. നിലവിൽ 24 മണിക്കൂർ, 7 ദിവസം, 90 ദിവസം എന്നിങ്ങനെയുള്ള 'ഡിസപ്പിയറിങ് മെസ്സേജസ്' സംവിധാനത്തേക്കാൾ വേഗത്തിൽ സന്ദേശങ്ങൾ നീക്കം ചെയ്യാൻ ഇതിലൂടെ സാധിക്കും.

ഒടിപി (OTP), വിലാസങ്ങൾ, വെരിഫിക്കേഷൻ കോഡുകൾ തുടങ്ങിയ സുപ്രധാന വിവരങ്ങൾ സുരക്ഷിതമായി കൈമാറാനാണ് ഈ ഫീച്ചർ പ്രധാനമായും ലക്ഷ്യമിടുന്നത്. റീഡ് റെസീപ്റ്റ്‌സ് (Blue Tick) ഓഫ് ചെയ്തു വെച്ചവർക്കും ഈ ഫീച്ചർ പ്രയോജനപ്പെടും. ചിത്രങ്ങൾക്കും വീഡിയോകൾക്കുമായി നിലവിലുള്ള 'വ്യൂ വൺസ്' (View Once) ഫീച്ചറിന് പിന്നാലെ ടെക്സ്റ്റ് സന്ദേശങ്ങൾക്കായാണ് വാട്‌സ്ആപ്പ് ഈ മാറ്റം കൊണ്ടുവരുന്നത്. ആൻഡ്രോയിഡ് ബീറ്റ പതിപ്പിലാണ് ഈ ഫീച്ചർ കണ്ടെത്തിയതെന്ന് പ്രമുഖ ടെക് വെബ്സൈറ്റായ വാബീറ്റ ഇൻഫോ (WAbetaInfo) റിപ്പോർട്ട് ചെയ്യുന്നു.