റീലുകൾക്കൊപ്പം ഇനി ഷോപ്പിങ്ങും; വരുമാനം നേടാൻ ക്രിയേറ്റർമാർക്ക് പുത്തൻ അവസരവുമായി ഇൻസ്റ്റഗ്രാം
സോഷ്യൽ മീഡിയ വഴിയുള്ള ഓൺലൈൻ വ്യാപാര രംഗത്ത് വലിയ മാറ്റങ്ങൾക്ക് തുടക്കമിട്ട് ഇൻസ്റ്റഗ്രാം. കണ്ടന്റ് ക്രിയേറ്റർമാർക്കും ഇൻഫ്ലുവൻസർമാർക്കും തങ്ങളുടെ അക്കൗണ്ടുകൾ വഴി ഉൽപ്പന്നങ്ങൾ നേരിട്ട് വിപണനം ചെയ്യാനും അതിലൂടെ വരുമാനമുണ്ടാക്കാനും സാധിക്കുന്ന പുതിയ 'ഷോപ്പിങ് മോണിറ്റൈസേഷൻ' സംവിധാനമാണ് കമ്പനി അവതരിപ്പിച്ചിരിക്കുന്നത്.
പഴയ പരസ്യ രീതികളിൽ നിന്ന് മാറി, ഉപയോക്താക്കൾക്ക് കൂടുതൽ എളുപ്പത്തിൽ സാധനങ്ങൾ വാങ്ങാനുള്ള സൗകര്യമൊരുക്കുകയാണ് ഇതിലൂടെ ലക്ഷ്യമിടുന്നത്. റീലുകൾ, സ്റ്റോറികൾ, എക്സ്പ്ലോർ ടാബ് തുടങ്ങിയവ പ്രയോജനപ്പെടുത്തി തങ്ങളുടെ ഉൽപ്പന്നങ്ങൾ കൂടുതൽ ആളുകളിലേക്ക് എത്തിക്കാൻ ബ്രാൻഡുകൾക്കും ക്രിയേറ്റർമാർക്കും ഇനി എളുപ്പത്തിൽ സാധിക്കും.
വീഡിയോകളിലും സ്റ്റോറികളിലും ഉൽപ്പന്നങ്ങളുടെ ടാഗുകൾ (Product Tags) നൽകാനുള്ള സൗകര്യമാണ് ഇതിൽ പ്രധാനം. ഇത് വഴി റീലുകൾ കാണുന്നതിനിടയിൽ തന്നെ ഉപയോക്താക്കൾക്ക് ഇഷ്ടപ്പെട്ട ഉൽപ്പന്നങ്ങളിൽ ക്ലിക്ക് ചെയ്ത് നേരിട്ട് വാങ്ങാനാകും. ഓരോരുത്തരുടെയും താല്പര്യങ്ങൾക്കനുസരിച്ച് ഷോപ്പിങ് ഫീഡുകൾ ക്രമീകരിക്കാനും സാധിക്കും. സ്വന്തമായി ബ്രാൻഡുകളോ ഉൽപ്പന്നങ്ങളോ വിൽക്കാൻ ആഗ്രഹിക്കുന്ന ക്രിയേറ്റർമാർക്ക് ഈ മാറ്റം വലിയ പിന്തുണയാകും.
സോഷ്യൽ കൊമേഴ്സ് മേഖലയിൽ വലിയ കുതിച്ചുചാട്ടത്തിന് ഇൻസ്റ്റഗ്രാമിന്റെ ഈ പുതിയ പരിഷ്കാരം വഴിവെക്കും. വീഡിയോ കണ്ടുകൊണ്ടിരിക്കെ തന്നെ പർച്ചേസ് നടത്തുന്ന രീതി വ്യാപകമാകുന്നത് ബ്രാൻഡുകൾക്കും ക്രിയേറ്റർമാർക്കും ഒരുപോലെ പുതിയ സാമ്പത്തിക സാധ്യതകളാണ് തുറന്നുനൽകുന്നത്. ഡിജിറ്റൽ വിപണിയിൽ കൂടുതൽ മത്സരങ്ങൾക്കും പുതുമകൾക്കും ഇത് കാരണമാകുമെന്നാണ് വിലയിരുത്തൽ.