ഡോൾഫിനെപ്പോലെ കടലിൽ കുതിക്കാൻ 'സൂപ്പർ സബ്'; അത്യാധുനിക അണ്ടർവാട്ടർ സൂപ്പർകാർ പുറത്തിറക്കി യു-ബോട്ട് വർക്സ്

സമുദ്രത്തിനടിയിൽ ഡോൾഫിനുകളുടെ വേഗതയിൽ സഞ്ചരിക്കാൻ കഴിയുന്ന ലോകത്തിലെ ഏറ്റവും വേഗതയേറിയ വ്യക്തിഗത അന്തർവാഹിനി 'സൂപ്പർ സബ്' വിപണിയിലെത്തുന്നു. ഡച്ച് കമ്പനിയായ യു-ബോട്ട് വർക്സ് നിർമ്മിച്ച ഈ അത്യാധുനിക സബ്മറൈന് ഏകദേശം 5.75 ദശലക്ഷം ഡോളറാണ് (ഏകദേശം 48 കോടി രൂപ) വില കണക്കാക്കുന്നത്. കടലിനടിയിൽ ഒമ്പത് നോട്ട്സ് വേഗതയിൽ സഞ്ചരിക്കാൻ ശേഷിയുള്ള ഈ വാഹനം ആഡംബര കപ്പലുകളുടെയും യാച്ചുകളുടെയും ഭാഗമായി വരും ദിവസങ്ങളിൽ മാറും.

സാധാരണ സബ്മറൈനുകളെ അപേക്ഷിച്ച് അതിവേഗത്തിൽ സഞ്ചരിക്കാൻ കഴിയുന്ന സൂപ്പർ സബിന് സമുദ്രനിരപ്പിൽ നിന്ന് 300 മീറ്റർ താഴ്ച വരെ ഡൈവ് ചെയ്യാൻ സാധിക്കും. സുതാര്യമായ അക്രിലിക് പ്രഷർ ഹൾ ഉള്ളതിനാൽ ഉള്ളിലിരിക്കുന്ന മൂന്ന് യാത്രക്കാർക്കും കടലിന്റെ 360 ഡിഗ്രി കാഴ്ചകൾ തടസ്സമില്ലാതെ ആസ്വദിക്കാനാകും. അടിയന്തര സാഹചര്യങ്ങളിൽ 96 മണിക്കൂർ വരെ ലൈഫ് സപ്പോർട്ട് നൽകാനുള്ള ശേഷിയും ഇതിനുണ്ട്. വൈഡ് ആംഗിൾ സോണാർ സംവിധാനം ഉപയോഗിച്ച് കടലിന്റെ അടിത്തട്ട് സ്കാൻ ചെയ്ത് സുരക്ഷിതമായ യാത്ര ഉറപ്പാക്കാൻ ഇതിന് സാധിക്കും.

വെള്ളത്തിനടിയിൽ ഒരു വിമാനത്തിൽ പറക്കുന്നതിന് സമാനമായ അനുഭവം നൽകുന്ന ഹൈഡ്രോഡൈനാമിക് ഡിസൈനാണ് ഇതിന്റെ പ്രത്യേകത. കുത്തനെ ചരിഞ്ഞ് വേഗത്തിൽ ഉയരാനും താഴാനും ഇതിന് സാധിക്കും. കരീബിയൻ ദ്വീപായ കുറാസാവോയ്ക്ക് സമീപം മാസങ്ങൾ നീണ്ട കടൽ പരീക്ഷണങ്ങൾ വിജയകരമായി പൂർത്തിയാക്കിയ ശേഷമാണ് വാഹനം വിപണിയിലെത്തുന്നത്. ശതകോടീശ്വരന്മാരുടെ ആഡംബര യാച്ചുകളുടെ ഭാഗമായി ആദ്യ സൂപ്പർ സബ് ഉടൻ തന്നെ കൈമാറുമെന്ന് കമ്പനി അറിയിച്ചു. സമുദ്ര പര്യവേക്ഷണങ്ങൾക്കും വിനോദയാത്രകൾക്കും പുതിയ മാനങ്ങൾ നൽകുന്നതാകും ഈ 'അണ്ടർവാട്ടർ സൂപ്പർ കാർ'.

English Slug: U-Boat Worx launches Super Sub, the world's fastest personal submarine with a top speed of 9 knots.