ബോക്സ് ഓഫീസ് റെക്കോർഡുകൾ തിരുത്തിക്കുറിച്ച് മുന്നേറുന്ന രൺവീർ സിംഗ് ചിത്രം 'ധുരന്ധർ: ദ റിവഞ്ച്' സിനിമാ ലോകത്തെ അമ്പരപ്പിക്കുന്ന പുതിയ പരീക്ഷണത്തിനൊരുങ്ങുന്നു. ചിത്രത്തിന്റെ ഒന്നും രണ്ടും ഭാഗങ്ങൾ കൂട്ടിച്ചേർത്ത് ഒരൊറ്റ സിനിമയായി തിയേറ്ററുകളിൽ എത്തിക്കാൻ നിർമ്മാതാക്കൾ പദ്ധതിയിടുന്നതായാണ് ഏറ്റവും പുതിയ വിവരം. ആദിത്യ ധർ സംവിധാനം ചെയ്ത ഈ ബിഗ് ബജറ്റ് ചിത്രം നിലവിൽ വലിയ തരംഗമാണ് സൃഷ്ടിച്ചുകൊണ്ടിരിക്കുന്നത്. ഹോങ്കോങ്ങിലെ ചിത്രത്തിന്റെ വിതരണക്കാരാണ് ഇത്തരമൊരു വാർത്ത ആദ്യം പുറത്തുവിട്ടത്. അവിടെ ഏപ്രിൽ 12-ന് ഒൻപത് മണിക്കൂർ നീളുന്ന ദൈർഘ്യത്തിൽ ചിത്രം റിലീസ് ചെയ്യുമെന്നാണ് സൂചന.

ഇതിന് പിന്നാലെയാണ് ഇന്ത്യയിലും സമാനമായ രീതിയിൽ 'ധുരന്ധർ: ഡയറക്ടേഴ്‌സ് കട്ട്' പുറത്തിറങ്ങുമെന്ന വാർത്തകൾ സജീവമായത്. ഇന്ത്യയിൽ ഏഴര മണിക്കൂർ ദൈർഘ്യത്തിലായിരിക്കും ചിത്രം പ്രദർശിപ്പിക്കുക എന്ന് റിപ്പോർട്ടുകൾ പറയുന്നു. ഐമാക്സ്, എച്ച്ഡിആർ, എപിക് തിയേറ്ററുകൾ തുടങ്ങിയ പ്രീമിയം സ്ക്രീനുകളിൽ ഏപ്രിൽ അഞ്ചിന് ചിത്രം എത്തിയേക്കുമെന്നും ആഴ്ചയിൽ രണ്ട് ഷോകൾ വീതം പ്രദർശിപ്പിക്കാനാണ് പദ്ധതിയെന്നും പറയപ്പെടുന്നു. ചിത്രത്തിന്റേതെന്ന പേരിൽ ഒരു സെൻസർ സർട്ടിഫിക്കറ്റ് സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ടെങ്കിലും ഇതിന്റെ ആധികാരികത ഇതുവരെ സ്ഥിരീകരിച്ചിട്ടില്ല.

ആരാധകർക്കിടയിൽ വലിയ ചർച്ചകൾ നടക്കുന്നുണ്ടെങ്കിലും സംവിധായകൻ ആദിത്യ ധറോ നായകൻ രൺവീർ സിംഗോ ഇതുവരെ ഔദ്യോഗികമായി പ്രതികരിച്ചിട്ടില്ല. ഒരൊറ്റ സിനിമയായി ഇത്രയും വലിയ ദൈർഘ്യത്തിൽ ചിത്രം എത്തുന്നത് ഇന്ത്യൻ സിനിമാ ചരിത്രത്തിൽ തന്നെ അപൂർവ്വമായ ഒന്നായിരിക്കും. വിവാദങ്ങൾക്കിടയിലും 'ധുരന്ധർ' നേടുന്ന വലിയ വിജയം അണിയറപ്രവർത്തകർക്ക് ഇത്തരം വലിയ പരീക്ഷണങ്ങൾക്ക് ആത്മവിശ്വാസം നൽകുന്നുണ്ട്.