'ധുരന്ധർ', 'ധുരന്ധർ 2: ദ റിവഞ്ച്' എന്നീ ചിത്രങ്ങളിലെ തകർപ്പൻ പ്രകടനത്തിലൂടെ പ്രേക്ഷകശ്രദ്ധ നേടിയ നടൻ രാകേഷ് ബേദിക്ക് നിർമാതാക്കളുടെ വക വൻ സമ്മാനം. ചിത്രത്തിന്റെ രണ്ട് ഭാഗങ്ങളിലും 'ജമീൽ ജമാലി' എന്ന കഥാപാത്രത്തെ അവിസ്മരണീയമാക്കിയ താരത്തിന് ഒരു കോടി രൂപ ബോണസായി നൽകി. ചിത്രത്തിന്റെ വിജയത്തിൽ രാകേഷ് ബേദിയുടെ പ്രകടനം വലിയ പങ്കുവഹിച്ചുവെന്ന വിലയിരുത്തലിനെത്തുടർന്നാണ് നിർമാതാക്കളുടെ ഈ തീരുമാനം.

യഥാർത്ഥത്തിൽ ചിത്രത്തിന്റെ രണ്ട് ഭാഗങ്ങൾക്കുമായി 50 ലക്ഷം രൂപയായിരുന്നു താരത്തിന് പ്രതിഫലമായി നിശ്ചയിച്ചിരുന്നത്. എന്നാൽ കഥാപാത്രത്തിന് ലഭിച്ച വൻ സ്വീകാര്യത കണക്കിലെടുത്ത് സംവിധായകൻ ആദിത്യ ധറും നിർമാതാക്കളും ചേർന്ന് പ്രതിഫലത്തേക്കാൾ ഇരട്ടി തുക ബോണസായി നൽകാൻ തീരുമാനിക്കുകയായിരുന്നു. തന്റെ അഭിനയ മികവിലൂടെ ജമീൽ ജമാലി എന്ന കഥാപാത്രം ആരാധകരുടെ പ്രിയപ്പെട്ടവനായി മാറിയതിൽ നിർമാതാക്കൾ വലിയ സംതൃപ്തി രേഖപ്പെടുത്തി.

രാകേഷ് ബേദിയുടെ കഠിനാധ്വാനത്തിന് ലഭിച്ച ഈ അംഗീകാരം സിനിമ മേഖലയിൽ വലിയ ചർച്ചയായിട്ടുണ്ട്. അദ്ദേഹത്തിന്റെ പ്രകടനം സിനിമയുടെ വലിയ വിജയത്തിന് കരുത്തായെന്നും, അതുകൊണ്ടാണ് ഇത്തരത്തിൽ ഒരു അധിക പ്രതിഫലം നൽകിയതെന്നും അണിയറപ്രവർത്തകർ വ്യക്തമാക്കി.