സ്മാർട്ട് യാത്രാസംവിധാനങ്ങൾ പ്രോത്സാഹിപ്പിക്കുന്നതിന്റെ ഭാഗമായി ഡ്രൈവർമാരില്ലാത്ത സ്വയം നിയന്ത്രിത വാഹനങ്ങൾക്ക് മാത്രമായി പ്രത്യേക ഔദ്യോഗിക നമ്പർ പ്ലേറ്റുകൾ അനുവദിച്ച് അബുദാബി. ഡിപ്പാർട്ട്‌മെന്റ് ഓഫ് മുൻസിപ്പാലിറ്റീസ് ആൻഡ് ട്രാൻസ്‌പോർട്ടിന് കീഴിലുള്ള അബുദാബി മൊബിലിറ്റിയാണ് ഈ പുതിയ പരിഷ്കാരം നടപ്പിലാക്കിയത്. സ്മാർട്ട് ആൻഡ് ഓട്ടോണമസ് സിസ്റ്റംസ് കൗൺസിലിന്റെ മേൽനോട്ടത്തിലാണ് ഈ നടപടി.

റോഡിലൂടെ പോകുന്ന ഇത്തരം അത്യാധുനിക വാഹനങ്ങളെ മറ്റ് ഡ്രൈവർമാർക്കും ട്രാഫിക് അധികൃതർക്കും ഒറ്റനോട്ടത്തിൽ തിരിച്ചറിയാനും, റോഡ് സുരക്ഷ വർദ്ധിപ്പിക്കാനും ഈ നീക്കം സഹായകരമാകും.

പ്രധാനമായും രണ്ട് വിഭാഗങ്ങളിലായാണ് ഈ പ്രത്യേക നമ്പർ പ്ലേറ്റുകൾ നൽകുന്നത്. രണ്ട് വിഭാഗങ്ങൾക്കും ആകർഷകമായ നീല നിറത്തിലുള്ള ഡിസൈനാണ് നൽകിയിട്ടുള്ളത്:

'ഓട്ടോ ഡ്രൈവ്' : വാണിജ്യാടിസ്ഥാനത്തിൽ പൊതുജനങ്ങൾക്കായി സർവീസ് നടത്തുന്ന ഓട്ടോണമസ് വാഹനങ്ങൾക്ക് ഈ പേരിലുള്ള നമ്പർ പ്ലേറ്റുകളാണ് നൽകുക.

'ടെസ്റ്റ്' : റോഡുകളിൽ പരീക്ഷണ ഓട്ടം നടത്തുന്ന ഓട്ടോണമസ് വാഹനങ്ങൾക്കായി ഈ പ്ലേറ്റുകൾ മാറ്റിവെച്ചിരിക്കുന്നു.

അബുദാബിയിൽ ഇത്തരം അത്യാധുനിക വാഹനങ്ങളുടെ കൃത്യമായ ഫീൽഡ് മോണിറ്ററിംഗിനും സാങ്കേതിക മാനദണ്ഡങ്ങൾ കമ്പനികൾ പാലിക്കുന്നുണ്ടെന്ന് ഉറപ്പുവരുത്താനും ഈ സംവിധാനം സഹായിക്കുമെന്ന് അബുദാബി മൊബിലിറ്റി വ്യക്തമാക്കി.

ഭാവിയിൽ സ്മാർട്ട് യാത്രാമേഖലയിൽ വലിയ മുന്നേറ്റം ലക്ഷ്യമിടുന്ന അബുദാബിയിൽ ഇതിനകം തന്നെ സ്വയം നിയന്ത്രിത ടാക്സികളും ബസുകളും വിജയകരമായി പരീക്ഷണ സർവീസുകൾ നടത്തിവരുന്നുണ്ട്. ഈ വർഷത്തിന്റെ (2026) ആദ്യ പകുതിയിൽ മാത്രം മുപ്പതിനായിരത്തിലധികം (31,075) ട്രിപ്പുകളാണ് അബുദാബിയിൽ ഓട്ടോണമസ് വാഹനങ്ങൾ പൂർത്തിയാക്കിയത്. പുതിയ നമ്പർ പ്ലേറ്റുകൾ കൂടി എത്തുന്നതോടെ ഈ മേഖലയിലെ സുരക്ഷയും നിയന്ത്രണങ്ങളും കൂടുതൽ കർശനമാക്കാൻ അധികൃതർക്ക് സാധിക്കും.