കണ്ണൂർ അന്താരാഷ്ട്ര വിമാനത്താവളത്തിൽ നിന്ന് ജിദ്ദയിലേക്ക് പുറപ്പെട്ട എയർ ഇന്ത്യ എക്സ്പ്രസ് വിമാനം സാങ്കേതിക തകരാറിനെ തുടർന്ന് തിരിച്ചിറക്കി. 180-ലധികം യാത്രക്കാരുമായി പറന്നുയർന്ന വിമാനം കണ്ണൂരിൽ തന്നെ സുരക്ഷിതമായി ലാൻഡ് ചെയ്തതായി വാർത്താ ഏജൻസിയായ പി.ടി.ഐ റിപ്പോർട്ട് ചെയ്തു.

കണ്ണൂരിൽ നിന്ന് രാവിലെ 7:40-നാണ് വിമാനം ജിദ്ദയിലേക്ക് പുറപ്പെട്ടത്. എന്നാൽ യാത്രാമധ്യേ വിമാനത്തിന് യന്ത്രത്തകരാർ കണ്ടെത്തുകയായിരുന്നു. തുടർന്ന് പൈലറ്റ് വിമാനം അടിയന്തരമായി തിരിച്ചിറക്കാൻ തീരുമാനിക്കുകയായിരുന്നു.

പുറപ്പെട്ട് രണ്ട് മണിക്കൂറിനുള്ളിൽ തന്നെ വിമാനം കണ്ണൂർ വിമാനത്താവളത്തിൽ തിരികെ എത്തിച്ചു. യാത്രക്കാരും ജീവനക്കാരും സുരക്ഷിതരാണെന്നും വിമാനത്തിന്റെ സാങ്കേതിക തകരാർ എന്താണെന്ന് പരിശോധിച്ചു വരികയാണെന്നും വിമാനത്താവള അധികൃതർ വ്യക്തമാക്കി.