വേനൽക്കാലത്തും അന്തരീക്ഷം തണുപ്പിച്ചു നിർത്തുന്ന അത്യാധുനിക സാങ്കേതികവിദ്യയുടെ സഹായത്തോടെ പുറത്തിറങ്ങി സമയം ചെലവഴിക്കാൻ അനുയോജ്യമായ പ്രധാന കേന്ദ്രങ്ങൾ പരിചയപ്പെടുത്തി ഖത്തർ ടൂറിസം.സാംസ്കാരിക കേന്ദ്രങ്ങൾ, വാട്ടർഫ്രണ്ട് നടപ്പാതകൾ, അത്യാധുനിക ലൈഫ് സ്റ്റൈൽ കേന്ദ്രങ്ങൾ എന്നിവയടങ്ങുന്ന ഈ ഇടങ്ങളിൽ വേനൽച്ചൂട് അറിയാതെ വർഷത്തിൽ എപ്പോഴും കുടുംബങ്ങൾക്കും സന്ദർശകർക്കും ഒരുപോലെ സമയം ചിലവഴിക്കാൻ സാധിക്കും.∙പ്രധാന കേന്ദ്രങ്ങൾ
ഗെവാൻ ഐലൻഡ്: പേൾ ഐലൻഡിന് സമീപം സ്ഥിതിചെയ്യുന്ന ഇവിടെ ലോകത്തിലെ ഏറ്റവും വലിയ ഔട്ട്ഡോർ എയർകണ്ടീഷൻ ചെയ്ത ഷോപ്പിങ് മാളായ 'ക്രിസ്റ്റൽ വോക്ക്' ഉൾപ്പെടുന്നു. 7,360 ചതുരശ്ര മീറ്ററിൽ വ്യാപിച്ചുകിടക്കുന്ന ഇവിടെ നൂറിലധികം റീട്ടെയിൽ, ഡൈനിങ് കേന്ദ്രങ്ങളുണ്ട്.സെൻട്രോ (റൗദത്ത് അൽ ഹമാമ): തുറസ്സായ സ്ഥലങ്ങളിൽ നിർമിച്ച ഈ കേന്ദ്രത്തിൽ കഫേകൾ, റസ്റ്ററന്റുകൾ, വെൽനസ് സെന്ററുകൾ എന്നിവ ക്ലൈമറ്റ് കൺട്രോൾ സംവിധാനത്തോടെ ലഭ്യമാക്കിയിരിക്കുന്നു.കതാറ കൾച്ചറൽ വില്ലേജ്: കലയും സംസ്‌കാരവും സമന്വയിക്കുന്ന കതാറയിലെ '21 ഹൈ സ്ട്രീറ്റ്' പൂർണമായും ഔട്ട്ഡോർ കൂളിങ് സാങ്കേതികവിദ്യയിലാണ് പ്രവർത്തിക്കുന്നത്. കടൽത്തീര കാഴ്ചകൾ ആസ്വദിച്ച് ഇവിടെ സമയം ചിലവഴിക്കാം.

പ്ലേസ് വെൻഡോം (ലുസെയ്ൽ): ഫൗണ്ടനുകളും കനാൽ കാഴ്ചകളും നിറഞ്ഞ ഈ മാളിന് ചുറ്റുമുള്ള നടപ്പാതകളിൽ ഇന്റഗ്രേറ്റഡ് കൂളിങ് സിസ്റ്റം ഒരുക്കിയിട്ടുണ്ട്.