പശ്ചിമേഷ്യൻ സംഘർഷം രൂക്ഷമായ സാഹചര്യത്തിൽ ഗൾഫ് മേഖലയിലെ സിബിഎസ്ഇ പരീക്ഷകൾ മാറ്റിവെച്ചു. വിദ്യാർത്ഥികളുടെ സുരക്ഷ മുൻനിർത്തിയാണ് സിബിഎസ്ഇ അധികൃതർ ഈ തീരുമാനമെടുത്തത്. പത്താം ക്ലാസിലെ വിദ്യാർത്ഥികൾക്ക് ഈ മാസം 11 വരെയുള്ള എല്ലാ പരീക്ഷകളും റദ്ദാക്കിയിട്ടുണ്ട്. പന്ത്രണ്ടാം ക്ലാസുകാർക്ക് ഈ ശനിയാഴ്ച നടക്കേണ്ടിയിരുന്ന പരീക്ഷയും മാറ്റിവെച്ചു.

ഗൾഫ് മേഖലയിലെ എല്ലാ രാജ്യങ്ങൾക്കും ഈ തീരുമാനം ബാധകമാണെന്ന് സിബിഎസ്ഇ അറിയിച്ചു. സംഘർഷം ആരംഭിച്ചത് മുതൽ മേഖലയിലെ പരീക്ഷാ നടത്തിപ്പ് തടസ്സപ്പെട്ടിരിക്കുകയാണ്. വരും ദിവസങ്ങളിലെ സാഹചര്യങ്ങൾ വിലയിരുത്തുന്നതിനായി ശനിയാഴ്ച വീണ്ടും ഉന്നതതല യോഗം ചേരും. ഇതിന് ശേഷമായിരിക്കും പുതുക്കിയ തീയതികളും പരീക്ഷാ നടത്തിപ്പും സംബന്ധിച്ച ഔദ്യോഗിക അറിയിപ്പ് ഉണ്ടാകുക.

യാത്രാ തടസ്സങ്ങളും നിലവിലെ സുരക്ഷാ ഭീഷണികളും കാരണം ആശങ്കയിലായിരുന്ന ആയിരക്കണക്കിന് ഇന്ത്യൻ വിദ്യാർത്ഥികൾക്കും രക്ഷിതാക്കൾക്കും വലിയ ആശ്വാസമാണ് ഈ തീരുമാനം. ഗൾഫിലെ സ്കൂളുകൾ ഇതിനകം തന്നെ വിദ്യാർത്ഥികളെയും രക്ഷിതാക്കളെയും മാറ്റിവെച്ച പരീക്ഷകളെക്കുറിച്ച് അറിയിച്ചു തുടങ്ങിയിട്ടുണ്ട്.