ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റിയുടെ (RTA) വിവിധ സേവന നിരക്കുകളും ട്രാഫിക് പിഴകളും ഗഡുക്കളായി (Instalments) അടയ്ക്കാനുള്ള സൗകര്യം ഇനി കൂടുതൽ എളുപ്പമാകും. മുൻപ് സ്മാർട്ട് കിയോസ്‌കുകളിൽ മാത്രം ലഭ്യമായിരുന്ന പ്രമുഖ പേയ്‌മെന്റ് പ്ലാറ്റ്‌ഫോമായ 'താബി' (Tabby) വഴിയുള്ള ഈ സൗകര്യമാണ് ആർ.ടി.എയുടെ ഔദ്യോഗിക വെബ്‌സൈറ്റ്, മൊബൈൽ ആപ്പ്, നൊൾ പേ (nol Pay) ആപ്പ് ഉൾപ്പെടെയുള്ള എല്ലാ ഡിജിറ്റൽ ചാനലുകളിലേക്കും വ്യാപിപ്പിച്ചത്. ട്രാഫിക് ഫൈനുകൾക്ക് പുറമെ ഡ്രൈവിംഗ് ലൈസൻസ്, വെഹിക്കിൾ രജിസ്ട്രേഷൻ പുതുക്കൽ, പാർക്കിംഗ് ഫീസ്, സാലിക് റീചാർജ് തുടങ്ങി 170-ലധികം സേവനങ്ങൾക്കായി ഈ സൗകര്യം പ്രയോജനപ്പെടുത്താം. ഉപഭോക്താക്കൾക്ക് തുക ഒരൊറ്റത്തവണ അടയ്ക്കുന്നതിന് പകരം അഡീഷണൽ പലിശയോ അധിക ചാർജുകളോ ഇല്ലാതെ 4 മാസത്തെ ഗഡുക്കളായി അടച്ചുതീർക്കാം എന്നതാണ് ഇതിന്റെ പ്രത്യേകത. ദുബായിയുടെ 'ക്യാഷ്‌ലെസ് സ്ട്രാറ്റജി'യുടെ ഭാഗമായി സേവനങ്ങൾ പൂർണ്ണമായും ഡിജിറ്റലാക്കുന്നതിനും ഉപഭോക്താക്കൾക്ക് സാമ്പത്തിക ആശ്വാസം നൽകുന്നതിനുമായാണ് ആർ.ടി.എ ഈ പുതിയ സംവിധാനം നടപ്പിലാക്കിയിരിക്കുന്നത്.