പ്രവാചക ജന്മദിനം (മീലാദുന്നബി) പ്രമാണിച്ച് യു.എ.ഇയിലെ പൊതു, സ്വകാര്യ മേഖലകൾക്ക് ഔദ്യോഗിക അവധി പ്രഖ്യാപിച്ചു. 2026 ഓഗസ്റ്റ് 28 വെള്ളി ഫെഡറൽ ഗവൺമെന്റ്, സ്വകാര്യ മേഖലകളിലെ ജീവനക്കാർക്ക് ശമ്പളത്തോടുകൂടിയ ഔദ്യോഗിക പൊതു അവധിയായിരിക്കും.രാജ്യത്തെ ഫെഡറൽ സർക്കാർ സ്ഥാപനങ്ങൾക്കും സ്വകാര്യ കമ്പനികൾക്കും ഒരുപോലെ അവധി ബാധകമായിരിക്കുമെന്ന് മാനവ വിഭവശേഷി-സ്വദേശിവൽക്കരണ മന്ത്രാലയവും ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്‌സസും അറിയിച്ചു.

ഇസ്ലാമിക് കലണ്ടർ പ്രകാരം റബീഉൽ അവ്വൽ 12-നാണ് അവധി ലഭിക്കുക. സാധാരണ വാരാന്ത്യ അവധി ദിവസങ്ങളോട് (ശനി, ഞായർ) ചേർന്നു വരുന്നതിനാൽ രാജ്യത്തെ ജീവനക്കാർക്ക് ദീർഘ വാരാന്ത്യ അവധി ആഘോഷിക്കാൻ അവസരം ലഭിക്കും.

രാജ്യത്തെ മുഴുവൻ തൊഴിലാളികൾക്കും ശമ്പളത്തോടുകൂടിയ അവധിയായിരിക്കും ഇതെന്ന് അധികൃതർ ഔദ്യോഗിക സർക്കുലറിലൂടെ വ്യക്തമാക്കി. വിശുദ്ധ ദിനത്തോടനുബന്ധിച്ച് യു.എ.ഇ ഭരണാധികാരികൾക്കും സ്വദേശികൾക്കും പ്രവാസികൾക്കും മന്ത്രാലയങ്ങൾ ആശംസകൾ നേർന്നു.