ഫിലിപ്പീൻസിലെ ഒരു സ്കൂളിലുണ്ടായ വെടിവെപ്പിൽ മൂന്ന് കൗമാരക്കാർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്ത ദാരുണ സംഭവത്തെ യു.എ.ഇ ശക്തമായി അപലപിച്ചു. മാനുഷിക മൂല്യങ്ങൾക്കും തത്ത്വങ്ങൾക്കും വിരുദ്ധമായി സുരക്ഷയും സ്ഥിരതയും തകർക്കാൻ ലക്ഷ്യമിട്ടുള്ള ഇത്തരം ക്രിമിനൽ അക്രമങ്ങളെ രാജ്യം പൂർണ്ണമായി തള്ളിക്കളയുന്നതായി യു.എ.ഇ വിദേശകാര്യ മന്ത്രാലയം (MoFA) പ്രസ്താവനയിലൂടെ അറിയിച്ചു.

മരണപ്പെട്ടവരുടെ കുടുംബങ്ങളോടും ഫിലിപ്പീൻസ് സർക്കാരിനോടും ജനങ്ങളോടും യു.എ.ഇ മന്ത്രാലയം തങ്ങളുടെ ആത്മാർത്ഥമായ അനുശോചനവും അനുഭാവവും രേഖപ്പെടുത്തി. ഒപ്പം പരിക്കേറ്റവർ എത്രയും വേഗം സുഖം പ്രാപിക്കട്ടെ എന്നും മന്ത്രാലയം ആശംസിച്ചു.

വർദ്ധിച്ചുവരുന്ന ഇത്തരം അക്രമങ്ങൾക്കെതിരെ അന്താരാഷ്ട്ര സമൂഹം ഒറ്റക്കെട്ടായി നിൽക്കണമെന്നും, സമാധാനാന്തരീക്ഷം തകർക്കാൻ ശ്രമിക്കുന്ന ഇത്തരം നശീകരണ ശക്തികളെ ശക്തമായി നേരിടണമെന്നും യു.എ.ഇ പ്രസ്താവനയിൽ വ്യക്തമാക്കി.