നൈജർ റിപ്പബ്ലിക്കിന്റെ തലസ്ഥാനമായ നിയാമേയിലെ ദിയോറി ഹമാനി അന്താരാഷ്ട്ര വിമാനത്താവളത്തിന് നേരെയുണ്ടായ ഭീകരാക്രമണത്തെ യു.എ.ഇ ശക്തമായി അപലപിച്ചു. നിരവധി പേരുടെ മരണത്തിനും പരിക്കുകൾക്കും ഇടയാക്കിയ ഈ ക്രൂരമായ ആക്രമണത്തിനെതിരെ യു.എ.ഇ വിദേശകാര്യ മന്ത്രാലയം (MoFA) പ്രത്യേക പ്രസ്താവന പുറത്തിറക്കി.

രാജ്യങ്ങളുടെ സുരക്ഷയും സ്ഥിരതയും തകർക്കുന്ന തരത്തിലുള്ള ഇത്തരം ക്രിമിനൽ പ്രവർത്തനങ്ങളെ യു.എ.ഇ ശക്തമായി എതിർക്കുന്നുവെന്ന് മന്ത്രാലയം വ്യക്തമാക്കി. അക്രമം, തീവ്രവാദം, ഭീകരവാദം എന്നിവയുടെ എല്ലാ രൂപങ്ങളെയും യു.എ.ഇ എക്കാലത്തും തള്ളിക്കളയുന്നതായും പ്രസ്താവനയിൽ പറയുന്നു.

അപകടത്തിൽ ജീവൻ നഷ്ടപ്പെട്ടവരുടെ കുടുംബങ്ങളോടും നൈജർ സർക്കാരിനോടും ജനങ്ങളോടും യു.എ.ഇ തങ്ങളുടെ ആത്മാർത്ഥമായ അനുശോചനവും സഹതാപവും അറിയിച്ചു. കൂടാതെ, ആക്രമണത്തിൽ പരിക്കേറ്റ എല്ലാവരും എത്രയും വേഗം സുഖം പ്രാപിക്കട്ടെ എന്നും മന്ത്രാലയം ആശംസിച്ചു.