ശംഖുപുഷ്പം ഉപയോഗിച്ച് തയ്യാറാക്കുന്ന നീല ചായ (ബ്ലൂ ടീ) മാനസികസമ്മർദം കുറയ്ക്കാൻ ഏറെ ഉത്തമമാണെന്ന് പഠനങ്ങൾ വ്യക്തമാക്കുന്നു. ഇതിൽ അടങ്ങിയിരിക്കുന്ന ആന്റിഓക്സിഡന്റുകളും പ്രകൃതിദത്ത സസ്യ പിഗ്മെന്റുകളായ ടെർനാറ്റിനുകളും ശരീരത്തിലെ സ്ട്രെസ് ഹോർമോണായ കോർട്ടിസോളിന്റെ അളവ് കുറയ്ക്കാനും നാഡീവ്യവസ്ഥയെ ശാന്തമാക്കാനും സഹായിക്കുന്നു. കൂടാതെ, ശരീരത്തിലെ വിഷാംശങ്ങൾ പുറന്തള്ളാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും നീല ചായ മികച്ചതാണ്.

ഫ്ലേവനോയ്ഡുകൾ, ആന്തോസയാനിനുകൾ, ട്രൈറ്റെർപെനോയിഡുകൾ തുടങ്ങിയ പോഷകങ്ങളാൽ സമ്പന്നമായ ശംഖുപുഷ്പ ചായയ്ക്ക് ആന്റി ഇൻഫ്ലമേറ്ററി, ആന്റി മൈക്രോബയൽ, നൂട്രോപിക് ഗുണങ്ങളുമുണ്ട്. കോശങ്ങളെ ഓക്സിഡേറ്റീവ് സ്ട്രെസിൽ നിന്ന് സംരക്ഷിക്കുന്നതിനൊപ്പം ശരീരത്തിന്റെ മൊത്തത്തിലുള്ള പ്രതിരോധശേഷി വർധിപ്പിക്കാനും ഈ ഔഷധച്ചായ സഹായിക്കും.