‘എം.വി ഹോൺഡിയസ്’ എന്ന ഡച്ച് ക്രൂയിസ് കപ്പലിൽ ഹാന്റ വൈറസ് ബാധിച്ചവരുടെ എണ്ണം എട്ടായി ഉയർന്നു. ഏറ്റവും ഒടുവിൽ രോഗം സ്ഥിരീകരിച്ചയാൾ നിലവിൽ സൂറിച്ചിലെ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്. ഇതുവരെ മൂന്ന് യാത്രക്കാരാണ് വൈറസ് ബാധയെത്തുടർന്ന് മരണപ്പെട്ടത്. കപ്പലിലെ സാഹചര്യം കണക്കിലെടുത്ത് യാത്രക്കാർക്കിടയിൽ സാമൂഹിക അകലം പാലിക്കാൻ ലോകാരോഗ്യ സംഘടന (WHO) കർശന നിർദ്ദേശം നൽകി.

മരണവും രോഗവ്യാപനവും

രണ്ട് ഡച്ച് പൗരന്മാരും ഒരു ജർമ്മൻ പൗരനുമാണ് ഇതുവരെ മരിച്ചത്. ഏപ്രിൽ ഒന്നിന് അർജന്റീനയിലെ ഉസുവായയിൽ നിന്ന് പുറപ്പെട്ട കപ്പലിൽ ഏപ്രിൽ ആറോടെയാണ് ആദ്യമായി ലക്ഷണങ്ങൾ കണ്ടുതുടങ്ങിയത്. രോഗം ബാധിച്ച ബ്രിട്ടീഷ് പൗരന്റെ രക്തപരിശോധനയിലൂടെയാണ് മരണകാരണം ഹാന്റ വൈറസാണെന്ന് സ്ഥിരീകരിച്ചത്. നിലവിൽ വെസ്റ്റ് ആഫ്രിക്കൻ തീരത്തുള്ള കപ്പലിൽ 23 രാജ്യങ്ങളിൽ നിന്നുള്ള 150 ഓളം യാത്രക്കാരാണുള്ളത്. വൈറസിന്റെ ആൻഡീസ് വകഭേദമാണ് പടരുന്നതെന്നാണ് പ്രാഥമിക നിഗമനം.

എന്താണ് ഹാന്റ വൈറസ്?

എലികളിലൂടെയാണ് ഈ വൈറസ് പ്രധാനമായും മനുഷ്യരിലേക്ക് പടരുന്നത്. എലികളുടെ ഉമിനീർ, മൂത്രം, കാഷ്ഠം എന്നിവയുമായുള്ള സമ്പർക്കത്തിലൂടെയോ ഇവ വായുവിൽ കലർന്ന് ശ്വസിക്കുന്നതിലൂടെയോ അണുബാധയുണ്ടാകാം. ശ്വാസകോശത്തെ ബാധിക്കുന്ന 'ഹാന്റ വൈറസ് പൾമണറി സിൻഡ്രോം' വിഭാഗം അതീവ അപകടകാരിയാണ്. ഇതിന് ഏകദേശം 40 ശതമാനത്തോളം മരണനിരക്കുണ്ട്. പനി, പേശിവേദന, തലവേദന, ശ്വാസതടസ്സം എന്നിവയാണ് പ്രധാന ലക്ഷണങ്ങൾ. നിലവിൽ ഹാന്റ വൈറസിന് മാത്രമായി പ്രത്യേക ചികിത്സ ലഭ്യമല്ല.