ആരോഗ്യസംരക്ഷണത്തിന്റെ ഭാഗമായി ചായയിലും കാപ്പിയിലും പഞ്ചസാര ഒഴിവാക്കാറുണ്ടെങ്കിലും, ദിവസവും കഴിക്കുന്ന പല ഭക്ഷണങ്ങളിലൂടെയും അറിയാതെ തന്നെ വലിയ അളവിൽ പഞ്ചസാര ശരീരത്തിലെത്തുന്നുണ്ട്. ഇത്തരത്തിൽ ഒളിച്ചിരിക്കുന്ന മധുരത്തെയാണ് 'ഹിഡൻ ഷുഗർ' (Hidden Sugar) എന്ന് വിളിക്കുന്നത്. ശരീരഭാരം വർധിക്കാനും ടൈപ്പ്-2 പ്രമേഹം, ഫാറ്റി ലിവർ, ഹൃദ്രോഗം, ദന്തക്ഷയം തുടങ്ങിയ ആരോഗ്യപ്രശ്നങ്ങൾക്കും ഇത് വഴിവെക്കും. ഉൽപ്പന്നങ്ങളുടെ രുചിയും ടെക്സ്ചറും കൂട്ടുന്നതിനും ഷെൽഫ് ലൈഫ് വർധിപ്പിക്കുന്നതിനുമാണ് നിർമ്മാതാക്കൾ ഇത്തരം ഭക്ഷണങ്ങളിൽ പഞ്ചസാര ചേർക്കുന്നത്.

'ഹിഡൻ ഷുഗർ' അടങ്ങിയ പ്രധാന ഭക്ഷണങ്ങൾ:

• ഫ്ലേവർഡ് യോഗർട്ട് & ബ്രെഡ്: ആരോഗ്യകരമെന്ന് കരുതുന്ന ഫ്ലേവർഡ് യോഗർട്ടുകളിലും വൈറ്റ്, ബ്രൗൺ ബ്രെഡുകളിലും മധുരം കൂട്ടാൻ പഞ്ചസാര ചേർക്കാറുണ്ട്.
• ടൊമാറ്റോ കെച്ചപ്പ്, സോസ്, സാലഡ് ഡ്രസിങ്: മധുരമുള്ളതായി തോന്നാത്ത കെച്ചപ്പുകളിലും സാലഡ് ഡ്രസിംഗുകളിലും ഉയർന്ന അളവിൽ പഞ്ചസാര അടങ്ങിയിട്ടുണ്ട്.
• പാക്കറ്റ് ഫ്രൂട്ട് ജ്യൂസ്, എനർജി ഡ്രിങ്കുകൾ: 100% സ്വാഭാവികം എന്ന് അവകാശപ്പെടുന്ന പ്രൊസസ്ഡ് ജ്യൂസുകളിലും സ്പോർട്സ് ഡ്രിങ്കുകളിലും അധിക മധുരം അടങ്ങിയിരിക്കുന്നു.
• ബ്രേക്ക്‌ഫാസ്റ്റ് സീരിയൽ & ഇൻസ്റ്റന്റ് ഓട്സ്: പ്രഭാതഭക്ഷണമായി ഉപയോഗിക്കുന്ന കോൺഫ്ലേക്സ്, ഗ്രാനോള, ഫ്ലേവർഡ് ഓട്സ് പാക്കറ്റുകൾ എന്നിവയിൽ പഞ്ചസാരയുടെ അളവ് കൂടുതലാണ്.
• പ്രോട്ടീൻ ബാറുകൾ & പീനട്ട് ബട്ടർ: ഫിറ്റ്നസ് ഭക്ഷണങ്ങളെന്ന പേരിൽ വിപണിയിലെത്തുന്ന പല പ്രോട്ടീൻ ബാറുകളിലും ചില ബ്രാൻഡ് പീനട്ട് ബട്ടറുകളിലും മധുരം ചേർക്കാറുണ്ട്.
• ബിസ്കറ്റുകൾ, ഇൻസ്റ്റന്റ് സൂപ്പുകൾ: ഉപ്പുള്ള ബിസ്കറ്റുകളിലും റെഡി-ടു-ഈറ്റ് സൂപ്പുകളിലും രുചി സന്തുലിതമാക്കാൻ ചെറിയ അളവിൽ പഞ്ചസാര ഉപയോഗിക്കാറുണ്ട്.

ഭക്ഷണസാധനങ്ങൾ വാങ്ങുമ്പോൾ പാക്കറ്റിലെ ലേബൽ പരിശോധിച്ച് "No Added Sugar" എന്ന് ഉറപ്പുവരുത്തുന്നത് ഹിഡൻ ഷുഗർ ഒഴിവാക്കാൻ സഹായിക്കും.