ഫിറ്റ്നസ് നിലനിർത്താൻ വിലകൂടിയ സപ്ലിമെന്റുകൾക്ക് പിന്നാലെ പോകുന്നവർക്ക് ബദലായി ദൈനംദിന ഭക്ഷണക്രമത്തിൽ ഉൾപ്പെടുത്താവുന്ന വിഭവമാണ് പച്ചപ്പട്ടാണി (ഗ്രീൻപീസ്). 100 ഗ്രാം ഗ്രീൻപീസിൽ 78 കാലറി മാത്രമാണുള്ളത്. പ്രോട്ടീൻ, ഭക്ഷ്യനാരുകൾ, വിറ്റാമിൻ സി, വിറ്റാമിൻ എ, മഗ്നീഷ്യം, കാർബോഹൈഡ്രേറ്റ് എന്നിവ ഇതിൽ വൻതോതിൽ അടങ്ങിയിട്ടുണ്ട്.

നാരുകളും പ്രോട്ടീനും ധാരാളമുള്ളതിനാൽ ഗ്രീൻപീസ് കഴിക്കുന്നത് വയറ് കൂടുതൽ നേരം നിറഞ്ഞ അനുഭവം നൽകുകയും അമിത വിശപ്പ് തടയുകയും ചെയ്യും. ഇത് ശരീരഭാരം നിയന്ത്രിക്കാൻ ആഗ്രഹിക്കുന്നവർക്ക് സഹായകരമാണ്. രക്തത്തിലെ പഞ്ചസാരയുടെ അളവ് പെട്ടെന്ന് ഉയരാതെ ക്രമീകരിച്ചു നിർത്താനും ഇതിലെ ഫൈബർ ഘടകങ്ങൾ കാർബോഹൈഡ്രേറ്റിന്റെ ആഗിരണ വേഗത കുറയ്ക്കാനും സഹായിക്കുന്നു.

രക്തസമ്മർദ്ദം സാധാരണ നിലയിലാക്കാനും ദോഷകരമായ എൽ.ഡി.എൽ (LDL) കൊളസ്ട്രോൾ കുറയ്ക്കാനും സഹായിക്കുന്ന ധാതുക്കൾ അടങ്ങിയിട്ടുള്ളതിനാൽ ഹൃദയാരോഗ്യ സംരക്ഷണം ഉറപ്പാക്കാം. എന്നാൽ ഗ്രീൻപീസിൽ ലെക്ടിനുകളും ഫൈറ്റിക് ആസിഡും അടങ്ങിയിട്ടുള്ളതിനാൽ അമിതമായി കഴിക്കുന്നത് ദഹനക്കേടിനും വായുകോപത്തിനും കാരണമായേക്കാം. അതിനാൽ മിതമായ അളവിൽ കഴിക്കുന്നതാണ് നല്ലതെന്ന് ആരോഗ്യ വിദഗ്ധർ നിർദ്ദേശിക്കുന്നു.