ഇറാൻ-അമേരിക്ക സമാധാന ധാരണയുടെ ഭാഗമായി ഹോർമുസ് കടലിടുക്ക് തുറന്നതോടെ ഇന്ന് മാത്രം 17 ലക്ഷം ബാരൽ എണ്ണയുമായി 55 കപ്പലുകൾ കടലിടുക്ക് പിന്നിട്ടു. അമേരിക്കൻ സെൻട്രൽ കമാൻഡാണ് (CENTCOM) ഈ നിർണായക വിവരം പുറത്തുവിട്ടത്. പശ്ചിമേഷ്യൻ സംഘർഷത്തെ തുടർന്ന് ഇറാൻ ഹോർമുസ് അടച്ചത് ആഗോള വിപണിയിൽ വലിയ പ്രതിസന്ധി സൃഷ്ടിച്ചിരുന്നു. നിലവിൽ ലെബനനിലെ ഇസ്രായേൽ ആക്രമണത്തിന്റെ പശ്ചാത്തലത്തിൽ പാത വീണ്ടും അടയ്ക്കുകയാണെന്ന് ഇറാൻ പ്രഖ്യാപിച്ചെങ്കിലും, പ്രശ്നപരിഹാരത്തിനായുള്ള അമേരിക്ക-ഇറാൻ ചർച്ചകൾ നാളെ സ്വിറ്റ്സർലൻഡിൽ പുനരാരംഭിക്കും. യു.എസ് വൈസ് പ്രസിഡന്റ് ജെ.ഡി. വാൻസ്, ഇറാൻ സ്പീക്കർ മുഹമ്മദ് ബാഗർ ഗാലിബാഫ് എന്നിവർക്കൊപ്പം പാകിസ്താൻ, ഖത്തർ പ്രതിനിധികളും ചർച്ചയിൽ പങ്കാളികളാകും.

അതേസമയം, യു.എസ് സൈനിക ഉപരോധം നീക്കിയതോടെ ഹോർമുസ് കടലിടുക്ക് കടന്ന ആദ്യ ഇന്ത്യൻ എൽ.എൻ.ജി (LNG) കപ്പലായ 'ദിഷ' ഗുജറാത്തിലെ ദഹേജ് തുറമുഖത്ത് എത്തിയത് ഇന്ത്യക്ക് വലിയ ആശ്വാസമായി. പശ്ചിമേഷ്യൻ യുദ്ധത്തെത്തുടർന്ന് മൂന്ന് മാസത്തിലേറെയായി കടലിടുക്കിൽ കുടുങ്ങിക്കിടക്കുകയായിരുന്ന കപ്പൽ, ജൂൺ 15-നാണ് ഇന്ത്യയിലേക്ക് പുറപ്പെട്ടത്. മാൾട്ടയുടെ പതാകയേന്തിയ 'ദിഷ' 62,370 മെട്രിക് ടൺ ദ്രവീകൃത പ്രകൃതിവാതകവുമായാണ് (LNG) ഇന്ത്യൻ തീരത്ത് നങ്കൂരമിട്ടത്.

ദിഷയ്ക്ക് ശേഷം മറ്റ് ഇന്ത്യൻ കപ്പലുകളൊന്നും നിലവിൽ ഹോർമുസ് കടന്നിട്ടില്ലെന്ന് കേന്ദ്ര സർക്കാർ വ്യക്തമാക്കി. വിദേശ കപ്പലുകളടക്കം 34 കപ്പലുകളാണ് ഇനി ഇന്ത്യയിലേക്ക് എത്താനുള്ളത്. ഇതിൽ 16 എണ്ണം രാസവളവും 15 എണ്ണം ഇന്ധനവും നിറച്ചവയാണ്. നിലവിൽ 13 ഇന്ത്യൻ കപ്പലുകൾ കൂടി കടലിടുക്ക് കടക്കാൻ അനുമതി തേടിയിട്ടുണ്ട്. ഈ കപ്പലുകളിലായി 539 ഇന്ത്യൻ നാവികരുണ്ടെന്നാണ് കണക്കുകൾ. ഇവരുടെ സുരക്ഷ ഉറപ്പാക്കിയിട്ടുണ്ടെന്നും കൂടുതൽ കപ്പലുകൾ എത്തുന്നതോടെ രാജ്യത്തെ ഊർജ്ജ-കാർഷിക പ്രതിസന്ധിക്ക് വലിയ അയവുണ്ടാകുമെന്നും കേന്ദ്ര സർക്കാർ പ്രത്യാശ പ്രകടിപ്പിച്ചു.