ഷാർജ എമിറേറ്റിലെ താമസക്കാർക്കും സന്ദർശകർക്കും നടത്തത്തിനും ജോഗിങ്ങിനുമായി പുതിയ അത്യാധുനിക റണ്ണിങ് ട്രാക്ക് തുറന്നു. ഷാർജയിലെ പ്രശസ്തമായ ഗ്രീൻ ബെൽറ്റ് ലേഡീസ് പാർക്കിലാണ് (Green Belt Ladies Park) 1.8 കിലോമീറ്റർ നീളത്തിൽ മനോഹരമായ ഈ ട്രാക്ക് നിർമ്മിച്ചിരിക്കുന്നത്. ട്രാക്കിന് ചുറ്റും പരിസ്ഥിതി സൗഹൃദപരമായ രീതിയിലുള്ള വെളിച്ച സംവിധാനങ്ങളും ആകർഷകമായ ലാൻഡ്‌സ്‌കേപ്പിങ്ങും ഒരുക്കിയിട്ടുണ്ട്. നിർമ്മാണ പ്രവർത്തനങ്ങൾ പൂർണ്ണമായി പൂർത്തിയാക്കിയ ശേഷമാണ് ട്രാക്ക് പൊതുജനങ്ങൾക്കായി തുറന്നുകൊടുത്തതെന്ന് ഷാർജ സിറ്റി മുനിസിപ്പാലിറ്റി അറിയിച്ചു.

സുരക്ഷിതവും സുഖപ്രദവുമായ അന്തരീക്ഷത്തിൽ ആരോഗ്യപരമായ ജീവിതശൈലിയെ പ്രോത്സാഹിപ്പിക്കുന്നതിനാണ് ഈ വിനോദ ഇടം ഒരുക്കിയിരിക്കുന്നത്. ഇത് പ്രദേശവാസികൾക്കും സന്ദർശകർക്കും ഏറെ ഉപകാരപ്പെടും. സുരക്ഷ, ഉപഭോക്തൃ സൗഹൃദം, ദീർഘകാല ഈട് എന്നിവ ഉറപ്പാക്കുന്നതിനായി ഏറ്റവും മികച്ച അന്താരാഷ്ട്ര മാനദണ്ഡങ്ങൾ പാലിച്ചാണ് ട്രാക്കിന്റെ നിർമ്മാണമെന്ന് ഷാർജ സിറ്റി മുനിസിപ്പാലിറ്റിയുടെ പ്രൊജക്ട് ആൻഡ് ഫെസിലിറ്റീസ് മെയിന്റനൻസ് ഡിപ്പാർട്ട്മെന്റ് ഡയറക്ടർ എഞ്ചിനീയർ ഹസൻ അബ്ദുൽ റസാഖ് പറഞ്ഞു.

ജനങ്ങൾക്ക് സുഖകരമായി നടക്കാനും കഠിനമായ കാലാവസ്ഥയോ അമിതമായ ഉപയോഗമോ മൂലമുണ്ടാകുന്ന നിറം മങ്ങലിനെ പ്രതിരോധിക്കാനും അനുയോജ്യമായ പ്രത്യേക സാങ്കേതികവിദ്യ ഉപയോഗിച്ചാണ് ട്രാക്ക് രൂപകൽപ്പന ചെയ്തിരിക്കുന്നത്. ഷാർജയുടെ നഗര, ജനസംഖ്യാ, വിനോദസഞ്ചാര വളർച്ചയ്ക്ക് അനുസൃതമായി പൊതുസേവനങ്ങൾ മെച്ചപ്പെടുത്തുന്നതിനായി മുനിസിപ്പാലിറ്റി നടപ്പിലാക്കുന്ന വിപുലമായ അടിസ്ഥാന സൗകര്യ വികസന പദ്ധതികളുടെ ഭാഗമായാണ് ഗ്രീൻ ബെൽറ്റ് പാർക്കിലെ ഈ പുതിയ നടപ്പാതയെന്നും അദ്ദേഹം കൂട്ടിച്ചേർത്തു.