കുവൈത്തിലെ ഫൈലാക ദ്വീപിൽ നിന്ന് പുരാതന കാലത്തെ അപൂർവമായ നിരവധി പുരാവസ്തുക്കൾ കണ്ടെത്തി. ദ്വീപിന്റെ മധ്യഭാഗത്തുള്ള അൽ-ഖുസൂർ മൊണാസ്ട്രിയിൽ (Al-Quṣūr Monastery) കുവൈത്ത്-ഫ്രഞ്ച് സംയുക്ത സംഘം നടത്തിയ ഖനനത്തിലാണ് നിർണ്ണായകമായ തെളിവുകൾ ലഭിച്ചത്. സിറിയക് ലിപിയിൽ ആലേഖനം ചെയ്ത മൺപാത്രങ്ങൾ, പുരാതന നാണയങ്ങൾ, ഉമയ്യദ്-അബ്ബാസിദ് കാലഘട്ടങ്ങളിലെ അവശിഷ്ടങ്ങൾ എന്നിവ കണ്ടെത്തിയവയിൽ ഉൾപ്പെടുന്നുവെന്ന് നാഷണൽ കൗൺസിൽ ഫോർ കൾച്ചർ, ആർട്സ് ആൻഡ് ലെറ്റേഴ്സ് അറിയിച്ചു.

ക്രിസ്തുവർഷം ഏഴാം നൂറ്റാണ്ടിന്റെ മധ്യം മുതൽ ഒമ്പതാം നൂറ്റാണ്ടിന്റെ മധ്യം വരെ ഇവിടെ ഒരു സന്യാസവാസകേന്ദ്രം നിലനിന്നിരുന്നതായി ഗവേഷകർ സ്ഥിരീകരിച്ചു. കിഴക്കൻ സിറിയക് പാരമ്പര്യം പിന്തുടർന്ന ഒരു ക്രിസ്ത്യൻ സമൂഹം ഇവിടെ താമസിച്ചിരുന്നു എന്നതിന് വ്യക്തമായ തെളിവുകളാണ് ഖനനത്തിലൂടെ ലഭിച്ചത്. ഒരു വലിയ പള്ളി, വിപുലമായ ഭക്ഷണശാല, പാചക സമുച്ചയം എന്നിവ ഉൾപ്പെട്ട ആശ്രമ സമുച്ചയവും ഇവിടെ കണ്ടെത്തിയിട്ടുണ്ട്. ഈ കണ്ടെത്തലുകൾ ആദ്യകാല ഇസ്ലാമിക കാലഘട്ടത്തിൽ നിലനിന്നിരുന്ന ക്രിസ്ത്യൻ-ഇസ്ലാമിക സഹവർത്തിത്വത്തെയാണ് സൂചിപ്പിക്കുന്നതെന്ന് ഫ്രഞ്ച് മിഷൻ സൂപ്പർവൈസർ ഡോ. ജൂലി ബോണെറിക് പറഞ്ഞു.

സിറിയക്, പേർഷ്യൻ ലിപികളിലുള്ള ശിലാലിഖിതങ്ങൾ, അലങ്കരിച്ച സുഗന്ധദ്രവ്യ കുപ്പികൾ, നാണയങ്ങൾ എന്നിവ ഏകദേശം 1,200 വർഷങ്ങൾക്ക് മുമ്പുള്ള ഈ പ്രദേശത്തെ മതപരവും സാമ്പത്തികവുമായ ജീവിതത്തെക്കുറിച്ച് വെളിച്ചം വീശുന്നു. ക്രിസ്ത്യൻ കാലഘട്ടത്തിൽ നിന്ന് ആദ്യകാല ഇസ്ലാമിക ഘട്ടത്തിലേക്കുള്ള ചരിത്രപരമായ പരിവർത്തനത്തെ ഈ കണ്ടെത്തലുകൾ വ്യക്തമാക്കുന്നതായി കുവൈത്ത് സർവകലാശാലയിലെ പ്രൊഫസർ ഹസ്സൻ അഷ്കനാനി വ്യക്തമാക്കി. 2011 മുതൽ ഈ പ്രദേശത്ത് ഖനനം തുടരുകയാണ്.