അടുത്ത മാസം മുതൽ ബഹ്‌റൈനിൽ ഒറ്റത്തവണ ഉപയോഗിക്കുന്ന നേർത്ത പ്ലാസ്റ്റിക് കവറുകൾക്ക് നിരോധനം നിലവിൽ വരാനിരിക്കെ, വ്യവസായികളും വ്യാപാരികളും അടിയന്തരമായി ഒരുക്കങ്ങൾ പൂർത്തിയാക്കണമെന്ന് ഇൻഡസ്ട്രി ആൻഡ് കൊമേഴ്‌സ് മന്ത്രാലയം നിർദ്ദേശിച്ചു. നിരോധനം പ്രാബല്യത്തിൽ വരും മുൻപ് തന്നെ വിപണിയിലുള്ള പഴയ സ്റ്റോക്കുകൾ വിറ്റഴിക്കാനും, പരിസ്ഥിതി സൗഹൃദ ബദൽ ഉൽപ്പന്നങ്ങൾ ഉറപ്പാക്കാനും മന്ത്രാലയത്തിലെ ഇൻസ്പെക്ഷൻ ആൻഡ് സ്റ്റാൻഡേർഡ് ഡയറക്ടറേറ്റ് ഡയറക്ടർ സയ്യിദ് അലി ശുബ്ബാർ കമ്പനികളോട് ആവശ്യപ്പെട്ടു.

പുതിയ നിബന്ധനകളെക്കുറിച്ച് വ്യക്തമാക്കുന്ന സമഗ്രമായ മാർഗ്ഗനിർദ്ദേശങ്ങൾ (Guidance Manual) മന്ത്രാലയം ഇതിനകം പുറത്തിറക്കിയിട്ടുണ്ട്. വ്യാപാരികളുടെ സംശയങ്ങൾ ദൂരീകരിക്കുന്നതിനായി പ്രത്യേക ബോധവൽക്കരണ ക്ലാസുകളും ആശയവിനിമയ സംവിധാനങ്ങളും മന്ത്രാലയം ഒരുക്കിയിട്ടുണ്ട്. ലോക വ്യാപാര സംഘടനയ്ക്ക് (WTO) കരട് നിയമം സമർപ്പിച്ച ശേഷം ബഹ്‌റൈൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രിയുമായും മറ്റ് ബന്ധപ്പെട്ട വ്യവസായ പ്രതിനിധികളുമായും വിശദമായ ചർച്ചകൾ നടത്തിയാണ് പുതിയ നിയമത്തിന് രൂപം നൽകിയതെന്ന് അധികൃതർ വ്യക്തമാക്കി.

ഭൂരിഭാഗം കമ്പനികളും പുതിയ മാറ്റങ്ങളോട് അനുകൂലമായാണ് പ്രതികരിക്കുന്നതെന്നും പല സ്ഥാപനങ്ങളും ഇതിനകം തന്നെ പരിസ്ഥിതി സൗഹൃദ ബദലുകളിലേക്ക് മാറിയെന്നും മന്ത്രാലയം കൂട്ടിച്ചേർത്തു. പുതിയ മാനദണ്ഡങ്ങൾക്കനുസരിച്ചുള്ള പ്ലാസ്റ്റിക് കവറുകൾ കണ്ടെത്താനും പഴയ സ്റ്റോക്കുകൾ ഒഴിവാക്കാനും വ്യാപാരികൾ നേരിടുന്ന പ്രായോഗിക വെല്ലുവിളികൾ മന്ത്രാലയം തിരിച്ചറിയുന്നുണ്ട്. എങ്കിലും, പ്രഖ്യാപിച്ച തീയതിക്ക് ശേഷം നിരോധനം കർശനമായി നടപ്പിലാക്കുമെന്നതിനാൽ എല്ലാ കച്ചവടക്കാരും നിയമം പാലിക്കാൻ അടിയന്തരമായി തയ്യാറാകണമെന്ന് അധികൃതർ ഓർമ്മിപ്പിച്ചു.