ചൈനയുടെ മുൻ ഭരണാധികാരി മാവോ സേതുങ്ങുമായി ബന്ധപ്പെട്ട മീം പരാമർശത്തെ തുടർന്നുണ്ടായ ശക്തമായ പ്രതിഷേധങ്ങൾക്ക് പിന്നാലെ ചൈനയിലെ ആരാധകരോട് പരസ്യമായി മാപ്പുപറഞ്ഞ് ഫ്രഞ്ച് ഫുട്‌ബോൾ താരം കിലിയൻ എംബാപ്പെ. തന്റെ പരാമർശം ചിന്താശൂന്യമായിരുന്നുവെന്നും ആരുടെയും വികാരങ്ങളെ വ്രണപ്പെടുത്താൻ ഉദ്ദേശിച്ചിരുന്നില്ലെന്നും താരം പ്രസ്താവനയിലൂടെ വ്യക്തമാക്കി. ചൈനയിലെ ജനങ്ങളോടും അവരുടെ ചരിത്രത്തോടും തനിക്ക് ആഴത്തിലുള്ള ബഹുമാനമുണ്ടെന്നും എംബാപ്പെ കൂട്ടിച്ചേർത്തു.

തന്റെ മുഖം ഉൾപ്പെടുത്തി നിർമ്മിച്ച ഇന്റർനെറ്റ് മീമുകളെക്കുറിച്ച് സംസാരിക്കുന്നതിനിടെ 'ചൈനീസ് ഏകാധിപതിയുടെ ശരീരത്തിൽ തന്റെ മുഖം ചേർത്ത മീമാണ് പ്രിയപ്പെട്ടത്' എന്ന് എംബാപ്പെ പറഞ്ഞതാണ് വിവാദങ്ങൾക്ക് വഴിവെച്ചത്. സംഭവം വെയ്ബോ ഉൾപ്പെടെയുള്ള ചൈനീസ് സോഷ്യൽ മീഡിയകളിൽ വലിയ പ്രതിഷേധത്തിന് കാരണമാകുകയും താരത്തെ ബഹിഷ്‌കരിക്കാൻ ആഹ്വാനമുണ്ടാകുകയും ചെയ്തു.

തുടർന്ന് പ്രമുഖ ചൈനീസ് ബ്രാൻഡുകളായ ഡോങ്പെങ് ബെവറേജ്, മെങ്നിയു, മിൽക്ക് ഗ്രൗണ്ട് എന്നിവർ എംബാപ്പെയുമായുള്ള കോടികളുടെ കരാറുകൾ റദ്ദാക്കി. കൂടാതെ ചൈനീസ് സ്റ്റേറ്റ് ടെലിവിഷൻ ലാലിഗ മത്സരങ്ങളുടെ സംപ്രേക്ഷണം നിർത്തിവെക്കുകയും ചെയ്തു. സംഭവത്തിൽ ലാലിഗയും ലാലിഗ പ്രസിഡന്റ് ജാവിയർ ടെബാസും ചൈനയോട് ഔദ്യോഗികമായി ക്ഷമാപണം നടത്തിയിട്ടുണ്ട്.