ജിദ്ദയിലെ കിങ് അബ്ദുൽ അസീസ് അന്താരാഷ്ട്ര വിമാനത്താവളത്തിൽ ക്രോസ് റൺവേ ടേക്ക്ഓഫ് പ്രവർത്തനങ്ങൾ ആരംഭിക്കാൻ ജനറൽ അതോറിറ്റി ഓഫ് സിവിൽ ഏവിയേഷൻ (GACA) അനുമതി നൽകി. വിമാനത്താവളത്തിലെ മൂന്ന് റൺവേകളിലും ഈ സംവിധാനം നടപ്പിലാക്കുന്നതോടെ, സൗദി അറേബ്യയിൽ ഇത്തരമൊരു സാങ്കേതികവിദ്യ ഉപയോഗിക്കുന്ന ആദ്യ വിമാനത്താവളമായി ജിദ്ദ എയർപോർട്ട് മാറി. ദേശീയ, അന്തർദേശീയ സുരക്ഷാ മാനദണ്ഡങ്ങൾ കൃത്യമായി പാലിക്കുന്നുണ്ടെന്ന് ഉറപ്പുവരുത്തിയ ശേഷമാണ് പുതിയ പ്രവർത്തനരീതിക്ക് അനുമതി നൽകിയിരിക്കുന്നത്.

വിമാനത്താവളത്തിന്റെ പ്രവർത്തനക്ഷമത വലിയ തോതിൽ വർധിപ്പിക്കാൻ ലക്ഷ്യമിട്ടാണ് ഈ മാറ്റം കൊണ്ടുവരുന്നത്. ക്രോസ് റൺവേ ടേക്ക്ഓഫ് സംവിധാനം നിലവിൽ വരുന്നതോടെ വിമാനങ്ങൾ റൺവേയിൽ ചിലവഴിക്കുന്ന സമയം കുറയുകയും തിരക്കേറിയ സമയങ്ങളിൽ വിമാനങ്ങളുടെ നീക്കം കൂടുതൽ സുഗമമാവുകയും ചെയ്യും. ഇത് വിമാനത്താവളത്തിലെ ട്രാഫിക് നിയന്ത്രണം എളുപ്പമാക്കുന്നതിനൊപ്പം യാത്രക്കാർക്ക് കൂടുതൽ മികച്ച യാത്രാനുഭവം നൽകുകയും ചെയ്യും.

പരിസ്ഥിതി സൗഹൃദപരമായ മാറ്റങ്ങൾക്കും ഈ പുതിയ സംവിധാനം വഴിയൊരുക്കുമെന്നാണ് പ്രതീക്ഷിക്കുന്നത്. വിമാനങ്ങൾ ടേക്ക്ഓഫിനായി റൺവേയിൽ കാത്തുകിടക്കുന്ന സമയം കുറയുന്നതിലൂടെ ഇന്ധന ഉപഭോഗം ഗണ്യമായി കുറയ്ക്കാൻ സാധിക്കും. സൗദിയുടെ ദേശീയ ഗതാഗത-ലോജിസ്റ്റിക്സ് പദ്ധതിയുടെ ഭാഗമായി വ്യോമയാന മേഖലയെ അന്താരാഷ്ട്ര നിലവാരത്തിലേക്ക് ഉയർത്തുന്നതിന്റെ സുപ്രധാന ചുവടുവെപ്പായാണ് ജിദ്ദ വിമാനത്താവളത്തിലെ ഈ പരിഷ്കാരം വിലയിരുത്തപ്പെടുന്നത്.