പ്രാദേശികവും അന്തർദ്ദേശീയവുമായ സുപ്രധാന സംഭവവികാസങ്ങൾ ചർച്ച ചെയ്യുന്നതിനായി സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാൻ ഈജിപ്ത് തലസ്ഥാനമായ കെയ്റോയിലെത്തി. പ്രധാനമായും സുഡാൻ, ലിബിയ എന്നീ രാജ്യങ്ങളിലെ നിലവിലെ രാഷ്ട്രീയ-സുരക്ഷാ സാഹചര്യങ്ങളാണ് ഈ ഉന്നതതല യോഗത്തിൽ പ്രധാന അജണ്ടയായത്. ഇരു രാജ്യങ്ങളിലും സമാധാനവും സുരക്ഷിതത്വവും സ്ഥിരതയും എത്രയും വേഗം തിരികെ കൊണ്ടുവരുന്നതിനായുള്ള അന്താരാഷ്ട്ര തലത്തിലുള്ള കൂട്ടായ ശ്രമങ്ങളെക്കുറിച്ചും നയതന്ത്ര നീക്കങ്ങളെക്കുറിച്ചും നേതാക്കൾ വിശദമായി സംസാരിച്ചു.

സൗദി വിദേശകാര്യ മന്ത്രിക്ക് പുറമെ ഈജിപ്ഷ്യൻ വിദേശകാര്യ മന്ത്രി ഡോ. ബദർ അബ്ദുൽ ആത്തി, തുർക്കി വിദേശകാര്യ മന്ത്രി ഹാകാൻ ഫിദാൻ, ആഫ്രിക്കൻ-അറബ് രാജ്യങ്ങളിലെ അമേരിക്കൻ പ്രസിഡന്റിന്റെ ചീഫ് അഡ്വൈസർ മസ്അദ് ബൗലസ് എന്നിവരും ഈ സുപ്രധാന യോഗത്തിൽ പങ്കെടുത്തു. മേഖലയിലെ സമാധാന ശ്രമങ്ങൾക്ക് വേഗത കൂട്ടാൻ ലക്ഷ്യമിട്ടുള്ളതായിരുന്നു നേതാക്കളുടെ ചർച്ചകൾ.

സൗദി വിദേശകാര്യ മന്ത്രിയുടെ രാഷ്ട്രീയകാര്യ ഉപദേഷ്ടാവ് പ്രിൻസ് മുസാബ് ബിൻ മുഹമ്മദ് അൽ ഫർഹാൻ, ഈജിപ്തിലെ സൗദി അംബാസഡർ സാലിഹ് ബിൻ ഈദ് അൽ ഹുസൈനി എന്നിവരും സൗദി പ്രതിനിധി സംഘത്തോടൊപ്പം യോഗത്തിൽ സംബന്ധിച്ചു.