മസ്‌കത്ത് നഗരത്തിലെ പൊതുസ്ഥലങ്ങളിലും പാർക്കുകളിലും പക്ഷികൾക്ക് ആഹാരം നൽകുന്നതിനെതിരെ കർശന മുന്നറിയിപ്പുമായി മസ്‌കത്ത് മുനിസിപ്പാലിറ്റി രംഗത്തെത്തി. ഇത്തരത്തിൽ തീറ്റ നൽകുന്നത് പരിസര മലിനീകരണത്തിനും പൊതുജനാരോഗ്യ പ്രശ്നങ്ങൾക്കും കാരണമാകുന്നുണ്ടെന്ന് അധികൃതർ ചൂണ്ടിക്കാട്ടി.

പൊതുസ്ഥലങ്ങളിൽ പക്ഷികൾക്കായി ഇടുന്ന ഭക്ഷണാവശിഷ്ടങ്ങൾ അഴുകി ദുർഗന്ധം വമിക്കുന്നതിനും, ഇത് എലി, ഈച്ച തുടങ്ങിയ പ്രാണികൾ പെരുകി രോഗങ്ങൾ പടരാൻ ഇടയാക്കുമെന്നും മുനിസിപ്പാലിറ്റി വ്യക്തമാക്കി. നഗരത്തിന്റെ ഭംഗി നശിപ്പിക്കുന്നതിനൊപ്പം താമസക്കാർക്കും കാൽനടയാത്രക്കാർക്കും ഇത് വലിയ ബുദ്ധിമുട്ടാണ് സൃഷ്ടിക്കുന്നത്.

പരിസ്ഥിതി ശുചിത്വം നിലനിർത്താനും രോഗവ്യാപനം തടയാനും പൊതുജനങ്ങൾ ഈ ശീലം പൂർണ്ണമായും ഒഴിവാക്കി സഹകരിക്കണമെന്ന് മുനിസിപ്പാലിറ്റി അഭ്യർത്ഥിച്ചു. നിയമം ലംഘിക്കുന്നവർക്കെതിരെ കർശന നടപടികൾ സ്വീകരിക്കുമെന്നും അധികൃതർ സൂചന നൽകിയിട്ടുണ്ട്.