പശ്ചിമേഷ്യയിൽ ഇറാൻ-ഇസ്രായേൽ സംഘർഷം രൂക്ഷമായതോടെ ഗൾഫ് രാഷ്ട്രങ്ങൾ കനത്ത സുരക്ഷാ നിയന്ത്രണങ്ങൾ ഏർപ്പെടുത്തി. മിസൈൽ ആക്രമണ ഭീഷണിയെത്തുടർന്ന് ദുബായ് അന്താരാഷ്ട്ര വിമാനത്താവളം (DXB), ദുബായ് വേൾഡ് സെൻട്രൽ (DWC) എന്നിവയുടെ പ്രവർത്തനം പൂർണ്ണമായും നിർത്തിവെച്ചു. ഇനിയൊരു അറിയിപ്പ് ഉണ്ടാകുന്നത് വരെ വിമാന സർവീസുകൾ ഉണ്ടായിരിക്കില്ലെന്ന് അധികൃതർ വ്യക്തമാക്കി. ദുബായ് ലക്ഷ്യമിട്ടെത്തിയ ഇറാന്റെ മിസൈലുകളെ പ്രതിരോധ സംവിധാനങ്ങൾ ഉപയോഗിച്ച് തകർത്തതായും റിപ്പോർട്ടുകളുണ്ട്.

ഇറാനിൽ ഇസ്രായേലും അമേരിക്കയും നടത്തിയ സംയുക്ത ആക്രമണത്തിന് പിന്നാലെ, ഗൾഫ് രാജ്യങ്ങളിലെ യുഎസ് സൈനിക താവളങ്ങൾ ലക്ഷ്യമിട്ട് ഇറാൻ പ്രത്യാക്രമണം ആരംഭിച്ചതോടെയാണ് വിമാനത്താവളങ്ങൾ അടയ്ക്കാൻ തീരുമാനിച്ചത്. മുൻകരുതൽ നടപടിയുടെ ഭാഗമായാണ് ഈ നീക്കമെന്ന് ദുബായ് എയർപോർട്ട് വക്താവ് അറിയിച്ചു. അബുദാബി സായിദ് അന്താരാഷ്ട്ര വിമാനത്താവളത്തിൽ നിന്നുള്ള സർവീസുകളും വഴിതിരിച്ചുവിടുകയോ റദ്ദാക്കുകയോ ചെയ്തിട്ടുണ്ട്. എമിറേറ്റ്‌സ്, ഫ്ലൈ ദുബായ് തുടങ്ങിയ എയർലൈനുകൾ സാഹചര്യം സൂക്ഷ്മമായി നിരീക്ഷിച്ചു വരികയാണ്.

അതിനിടെ, കുവൈത്ത് വിമാനത്താവളത്തിന് നേരെ ഇറാന്റെ ഡ്രോൺ ആക്രമണം ഉണ്ടായതായി റിപ്പോർട്ടുകൾ പുറത്തുവന്നു. വിമാനത്താവളത്തിലെ ടെർമിനൽ ഒന്നിന് നേരെയാണ് ആക്രമണം നടന്നത്. സംഭവത്തിൽ വിമാനത്താവള ജീവനക്കാർക്ക് പരിക്കേറ്റതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. മേഖലയിലെ സുരക്ഷാ സാഹചര്യം അതീവ ഗുരുതരമായതോടെ മിക്ക ഗൾഫ് രാഷ്ട്രങ്ങളും തങ്ങളുടെ വ്യോമപാതകൾ അടച്ചിരിക്കുകയാണ്.