വ്യാജ ഇൻഷുറൻസ് കമ്പനികളുടെ ചതിക്കുഴികളിൽ വീഴാതിരിക്കാൻ താമസക്കാർക്ക് കർശന മുന്നറിയിപ്പ് നൽകി ദുബായ് പോലീസ്. ഏതെങ്കിലും തരത്തിലുള്ള പേയ്‌മെന്റുകൾ നടത്തുന്നതിന് മുമ്പ് ഇൻഷുറൻസ് ദാതാക്കളുടെ ലൈസൻസും രേഖകളും കൃത്യമായി പരിശോധിച്ച് ഉറപ്പുവരുത്തണമെന്ന് അധികൃതർ നിർദ്ദേശിച്ചു. സോഷ്യൽ മീഡിയ പ്ലാറ്റ്‌ഫോമുകൾ വഴി ആകർഷകമായ ഓഫറുകൾ നൽകി ആളുകളെ കബളിപ്പിക്കുന്ന അനധികൃത സ്ഥാപനങ്ങൾ വർദ്ധിച്ചുവരുന്ന സാഹചര്യത്തിലാണ് പോലീസിന്റെ ഈ ബോധവൽക്കരണ കാമ്പയിൻ.

കമ്പോള വിലയേക്കാൾ വളരെ കുറഞ്ഞ നിരക്കിൽ വാഹന-ആരോഗ്യ ഇൻഷുറൻസ് സേവനങ്ങൾ വാഗ്ദാനം ചെയ്താണ് ഇത്തരം തട്ടിപ്പ് സംഘങ്ങൾ ഇരകളെ കണ്ടെത്തുന്നത്. അതിവേഗത്തിലുള്ള ഇൻഷുറൻസ് സേവനങ്ങളും അവിശ്വസനീയമായ ഓഫറുകളും വാഗ്ദാനം ചെയ്യുന്ന പരസ്യങ്ങൾ സോഷ്യൽ മീഡിയയിൽ കണ്ട് കമ്പനിയുടെ നിയമസാധുത പരിശോധിക്കാതെ പണം നൽകുന്നവർ വഞ്ചിതരാകാൻ സാധ്യതയുണ്ട്. ദുബായ് പോലീസിന് പുറമെ ഈ വർഷം ജനുവരിയിൽ റാസൽഖൈമ പോലീസും സമാനമായ മുന്നറിയിപ്പ് നൽകിയിരുന്നു. യുഎഇയിൽ പ്രവർത്തിക്കുന്ന എല്ലാ അംഗീകൃത ഇൻഷുറൻസ് കമ്പനികളും ഔദ്യോഗിക അതോറിറ്റികളുടെ കർശന മേൽനോട്ടത്തിലും നിയന്ത്രണത്തിലുമാണ് പ്രവർത്തിക്കുന്നതെന്ന് പോലീസ് ഓർമ്മിപ്പിച്ചു.

സൈബർ തട്ടിപ്പുകൾക്കെതിരെയുള്ള ആദ്യ പ്രതിരോധം വ്യക്തിഗതമായ ജാഗ്രതയാണെന്നും പോലീസ് വ്യക്തമാക്കി. ഇൻഷുറൻസ് വാങ്ങുന്നതിന് മുമ്പ് ബ്രോക്കർമാരുടെയും ഏജന്റുമാരുടെയും ട്രേഡ് ലൈസൻസുകൾ വിശദമായി പരിശോധിക്കണം. സംശയാസ്പദമായ ഏതെങ്കിലും തട്ടിപ്പ് ശ്രമങ്ങൾ ശ്രദ്ധയിൽപ്പെട്ടാൽ ഉടൻ തന്നെ ഇ-ക്രൈം (eCrime) പ്ലാറ്റ്‌ഫോം വഴിയോ 901 എന്ന നോൺ-എമർജൻസി നമ്പറിലോ വിളിച്ച് റിപ്പോർട്ട് ചെയ്യണമെന്നും ദുബായ് പോലീസ് നിർദ്ദേശിച്ചു.