ദുബായ് ഷോപ്പിംഗ് ഫെസ്റ്റിവലിന്റെ (DSF) 31ാമ​ത്​ പതിപ്പ് ഡിസംബർ അഞ്ചിന് ആരംഭിക്കും. ദുബായ് ടൂറിസം വകുപ്പിന് കീഴിലുള്ള ദുബായ് ഫെസ്റ്റിവൽസ് ആൻഡ് റീട്ടെയിൽ എസ്റ്റാബ്ലിഷ്മെന്റ് (DFRE) ആണ് ഈ ആഘോഷത്തിന് നേതൃത്വം നൽകുന്നത്. 2026 ജനുവരി 11 വരെ നീണ്ടുനിൽക്കുന്ന ഈ 38 ദിവസത്തെ ഷോപ്പിംഗ് ഉത്സവത്തിൽ സന്ദർശകരെ ആകർഷകമായ സമ്മാനങ്ങളാണ് കാത്തിരിക്കുന്നത്.

ഇതിൽ, 200 ദിർഹമിന് ഷോപ്പിംഗ് നടത്തുന്നവരിൽ നിന്ന് ദിവസേന തിരഞ്ഞെടുക്കപ്പെടുന്ന വിജയികൾക്ക് നിസ്സാൻ കാറും ഒരു ലക്ഷം ദിർഹം ക്യാഷ് പ്രൈസും സമ്മാനമായി ലഭിക്കും. കൂടാതെ, അവസാന ദിവസം നടക്കുന്ന മെഗാ നറുക്കെടുപ്പിൽ വിജയിക്കുന്ന ഭാഗ്യശാലിക്ക് നാല് ലക്ഷം ദിർഹമാണ് സമ്മാനമായി ലഭിക്കുക. എല്ലാ ആഴ്ചയും നടക്കുന്ന നറുക്കെടുപ്പുകളിലൂടെ 26 ലക്ഷം ദിർഹം വിലമതിക്കുന്ന സ്വർണ്ണവും സമ്മാനമായി നൽകുന്നുണ്ട്.

ദുബായിലെ താമസക്കാർക്കും സന്ദർശകർക്കും 100 ദിർഹം വിലയുള്ള റാഫിൾ ടിക്കറ്റുകൾ നിലവിൽ വാങ്ങാൻ സാധിക്കുന്നതാണ്. ട്രാഫിക് ആൻഡ് വെഹിക്കിൾ രജിസ്‌ട്രേഷൻ സെന്ററുകൾ, ഇനോക് സ്റ്റേഷനുകൾ, സൂം സ്റ്റോറുകൾ, ഓട്ടോപ്രോ സർവീസ് ഔട്ട്ലെറ്റുകൾ എന്നിവയുൾപ്പെടെയുള്ള സ്ഥലങ്ങളിൽ ടിക്കറ്റുകൾ ലഭ്യമാണ്.