എക്സൈസ് നികുതിക്ക് വിധേയമായ ഉൽപന്നങ്ങളുടെ നികുതി സ്റ്റാമ്പുകൾ കൃത്യമാണോ എന്ന് പരിശോധിക്കാൻ പൊതുജനങ്ങൾക്ക് നികുതി അതോറിറ്റി നിർദ്ദേശം നൽകി. വിപണിയുടെ വിശ്വാസ്യതയും ഉപഭോക്തൃ സുരക്ഷയും ഉറപ്പാക്കുന്നതിന്റെ ഭാഗമായാണ് ഈ നടപടി. മധുരപാനീയങ്ങളും കാർബണേറ്റഡ് പാനീയങ്ങളും ഒഴികെയുള്ള, എക്സൈസ് നികുതി ബാധകമായ എല്ലാ ഉൽപന്നങ്ങളിലും സാധുവായ ഡിജിറ്റൽ നികുതി സ്റ്റാമ്പ് (Digital Tax Stamp) ഉണ്ടെന്ന് ഉപഭോക്താക്കൾ ഉറപ്പുവരുത്തണം.

ഇത്തരം ഉൽപന്നങ്ങൾ വാങ്ങുന്നതിന് മുമ്പ് അവയിലെ സ്റ്റാമ്പുകൾ അസ്സലാണോ എന്ന് പരിശോധിക്കാൻ ‘താകദ്’ (Taqad) മൊബൈൽ ആപ്പ് ഉപയോഗിക്കണമെന്ന് അതോറിറ്റി അറിയിച്ചു. ഉൽപന്നത്തിന്റെ പാക്കേജിംഗിലുള്ള ഡിജിറ്റൽ അടയാളം ഈ ആപ്പ് വഴി സ്കാൻ ചെയ്താൽ അവ ദേശീയ നികുതി മാനദണ്ഡങ്ങൾ പാലിച്ചതാണോ എന്ന് മനസ്സിലാക്കാം.

നിയമപരമായ സർട്ടിഫിക്കേഷൻ ഇല്ലാത്ത ഉൽപന്നങ്ങൾ വിപണിയിലെത്തുന്നത് തടയാനും റീട്ടെയിൽ മേഖലയിലെ സുതാര്യത നിലനിർത്താനും ഈ പരിശോധന അത്യന്താപേക്ഷിതമാണെന്ന് അതോറിറ്റി വ്യക്തമാക്കി. ഉപഭോക്താക്കൾക്ക് തങ്ങൾ വാങ്ങുന്ന സാധനങ്ങൾ ഗുണനിലവാരമുള്ളതും നികുതി നിയമങ്ങൾ പാലിക്കുന്നതുമാണെന്ന് ഇതിലൂടെ നേരിട്ട് ബോധ്യപ്പെടാൻ സാധിക്കും.