സിവിൽ ഡിഫൻസിന്റെ അടിയന്തര മുന്നറിയിപ്പുകൾ നൽകുന്ന ആപ്പാണെന്ന് തെറ്റിദ്ധരിപ്പിച്ച് ഉപയോക്താക്കളുടെ വിവരങ്ങൾ ചോർത്തുന്ന വ്യാജ മൊബൈൽ ആപ്പുകൾക്കെതിരെ ബഹ്‌റൈൻ സൈബർ സുരക്ഷാ വിഭാഗത്തിന്റെ മുന്നറിയിപ്പ്. 'BH Alert' എന്ന പേരിൽ ആൻഡ്രോയിഡ് ഫോണുകളെ ലക്ഷ്യമിട്ടാണ് പ്രധാനമായും ഈ മാൽവെയർ പ്രചരിക്കുന്നത്. ഔദ്യോഗിക ഗൂഗിൾ പ്ലേ സ്റ്റോറിന്റെയും സർക്കാർ പോർട്ടലുകളുടെയും മാതൃകയിലുള്ള വ്യാജ ലിങ്കുകൾ നിർമ്മിച്ചാണ് തട്ടിപ്പുകാർ ആളുകളെ കബളിപ്പിക്കുന്നത്.

ഡ്രീം റിസർച്ച് ലാബ്സ് പുറത്തുവിട്ട റിപ്പോർട്ടിലാണ് ഈ പുതിയ സൈബർ തട്ടിപ്പിനെക്കുറിച്ചുള്ള വിവരങ്ങളുള്ളത്. മിസൈൽ ആക്രമണങ്ങളും സിവിൽ ഡിഫൻസ് സൈറണുകളും മുഴങ്ങുന്ന അടിയന്തര സാഹചര്യങ്ങൾ മുതലെടുത്താണ് തട്ടിപ്പുകാർ ജനങ്ങളിലേക്ക് ഇത്തരം വ്യാജ ആപ്പുകൾ എത്തിക്കുന്നത്. ആഭ്യന്തര മന്ത്രാലയം, സിവിൽ ഡിഫൻസ്, ഇൻഫർമേഷൻ ആൻഡ് ഇ-ഗവൺമെന്റ് അതോറിറ്റി തുടങ്ങിയ ഔദ്യോഗിക സ്ഥാപനങ്ങളുടെ ലോഗോകളും പേരുകളും ദുരുപയോഗം ചെയ്താണ് ആപ്പ് രൂപകൽപ്പന ചെയ്തിരിക്കുന്നത്.

മൊബൈൽ ഫോണുകളുടെ പൂർണ്ണ നിയന്ത്രണം ഏറ്റെടുക്കാനും എസ്.എം.എസുകൾ, ഒ.ടി.പികൾ, കോൺടാക്റ്റുകൾ, ബാങ്കിംഗ് വിവരങ്ങൾ എന്നിവ ചോർത്താനും ഈ മാൽവെയറിന് സാധിക്കും. ഔദ്യോഗിക വെബ്‌സൈറ്റുകളോ വെരിഫൈഡ് സോഷ്യൽ മീഡിയ അക്കൗണ്ടുകളോ വഴി മാത്രം ആപ്പുകൾ ഡൗൺലോഡ് ചെയ്യാനും, വാട്സാപ്പ്, എസ്.എം.എസ്, ഇമെയിൽ എന്നിവയിലൂടെ ലഭിക്കുന്ന അജ്ഞാത ലിങ്കുകളിൽ ക്ലിക്ക് ചെയ്യാതിരിക്കാനും അധികൃതർ പൊതുജനങ്ങൾക്ക് നിർദ്ദേശം നൽകി.