കുവൈത്തിൽ താപനില കുത്തനെ ഉയർത്തിക്കൊണ്ട് കടുത്ത വേനൽക്കാല സീസൺ ആരംഭിക്കുന്നു. നിലവിലുള്ള 'അൽ തുവൈബി' സീസൺ അവസാനിച്ച് ജൂലൈ മൂന്ന് മുതൽ രാജ്യത്ത് 'ഒന്നാം ജെമിനി' സീസൺ ആരംഭിക്കും. 13 ദിവസം നീണ്ടുനിൽക്കുന്ന ഈ കാലയളവാണ് വർഷത്തിലെ ഏറ്റവും ചൂടേറിയ സമയമായി കണക്കാക്കപ്പെടുന്നത്. വരണ്ട കാലാവസ്ഥയും കടുത്ത ചൂടുള്ള കാറ്റുമാണ് ഒന്നാം ജമിനി സീസണിന്റെ പ്രത്യേകത. സൗര, ചാന്ദ്ര കലണ്ടറുകളിൽ ‘അൽ ഹഖ’ എന്നും ഇതറിയപ്പെടുന്നു. ഈ സമയത്ത് സൂര്യൻ വടക്കേ അറ്റത്ത് നിന്ന് ക്രമേണ തെക്കോട്ട് ഭൂമധ്യരേഖയിലേക്ക് നീങ്ങാൻ തുടങ്ങും.

ഒന്നാം ഘട്ടത്തിന് പിന്നാലെ 13 ദിവസം നീണ്ടുനിൽക്കുന്ന 'രണ്ടാം ജെമിനി' സീസൺ ആരംഭിക്കും. പകലിന്റെ ദൈർഘ്യം കൂടുന്ന ഈ സമയം ‘ബഹൂറ വേനൽ’ എന്നാണ് അറിയപ്പെടുന്നത്. ഈ സീസണിൽ രാത്രിയിൽ പോലും ശക്തമായ ചൂടുകാറ്റും അന്തരീക്ഷത്തിൽ ഉയർന്ന ഈർപ്പവും അനുഭവപ്പെടും.

ഇതിനുശേഷമാണ് വേനൽക്കാലത്തിന്റെ ഏറ്റവും തീവ്രമായ 'മിർസാം' സീസൺ വരുന്നത്. ഈ ഘട്ടത്തിൽ പകൽ താപനില റെക്കോർഡ് തലത്തിലേക്ക് ഉയരുകയും തീരപ്രദേശങ്ങളിൽ കടുത്ത ഉഷ്ണവും ഈർപ്പവും അനുഭവപ്പെടുകയും ചെയ്യും. എന്നാൽ ഓഗസ്റ്റ് അവസാനത്തോടെ മിർസാം സീസൺ അവസാനിക്കുന്നതോടെ ചൂടിന് ശമനമാകും.