നേപ്പാളിലുണ്ടായ ശക്തമായ മിന്നൽപ്രളയത്തിന്റെ പശ്ചാത്തലത്തിൽ അതിർത്തി സംസ്ഥാനങ്ങളായ ഉത്തർപ്രദേശിലും ബിഹാറിലും ജാഗ്രത ശക്തമാക്കി. സ്ഥിതിഗതികൾ വിലയിരുത്താൻ ഇരു സംസ്ഥാനങ്ങളിലെയും മുഖ്യമന്ത്രിമാർ അടിയന്തര യോഗം ചേർന്നു. ബിഹാർ മുഖ്യമന്ത്രി നിതീഷ് കുമാറുമായി കേന്ദ്ര ആഭ്യന്തര മന്ത്രി അമിത് ഷാ ഫോണിൽ സംസാരിച്ച് സ്ഥിതിഗതികൾ വിലയിരുത്തി.

നേപ്പാളിൽനിന്ന് നിരവധി നദികൾ ബിഹാറിലൂടെ ഒഴുകുന്നുണ്ട്. മിന്നൽപ്രളയമുണ്ടായ ഗണ്ഡക്, കോസി നദികളും ഇതിൽപ്പെടുന്നു. ഹിമാലയത്തിലും ടിബറ്റിലും ഉത്ഭവിക്കുന്ന ഈ നദികൾ നേപ്പാളിലൂടെ ഒഴുകി ഇന്ത്യൻ സമതലങ്ങളിലേക്ക് പ്രവേശിക്കുന്നതിനാൽ ജലനിരപ്പ് ഉയരാനുള്ള സാധ്യത കണക്കിലെടുത്താണ് ബിഹാറിൽ ജാഗ്രത ശക്തമാക്കിയത്.

അതിനിടെ, നേപ്പാളിലെ ദുരന്തത്തിൽ ഇന്ത്യ അനുശോചനം രേഖപ്പെടുത്തി. നേപ്പാൾ പ്രധാനമന്ത്രി ബാലേന്ദ്ര ഷായുമായി പ്രധാനമന്ത്രി നരേന്ദ്ര മോദി ഫോണിൽ സംസാരിച്ചു. നേപ്പാൾ ജനതയ്‌ക്കൊപ്പം ഇന്ത്യ ഉറച്ചുനിൽക്കുമെന്നും സാധ്യമായ എല്ലാ മാനുഷിക സഹായങ്ങളും നൽകാൻ തയ്യാറാണെന്നും മോദി അറിയിച്ചു. രക്ഷാപ്രവർത്തനങ്ങളിലും ദുരിതാശ്വാസ പ്രവർത്തനങ്ങളിലും ഇന്ത്യയുടെ പിന്തുണ തുടരുമെന്നും പ്രധാനമന്ത്രി വ്യക്തമാക്കി.

നേപ്പാൾ ടൂറിസം അധികൃതരുടെ കണക്കനുസരിച്ച് 105 ഇന്ത്യക്കാരടക്കം 291 വിദേശപൗരന്മാരെയാണ് മിന്നൽപ്രളയത്തെ തുടർന്ന് കാണാതായത്. കാണാതായവരിൽ മലയാളികൾ ഉൾപ്പെട്ടിട്ടുണ്ടോ എന്നത് വ്യക്തമല്ല. ഇന്ത്യൻ പൗരന്മാരെക്കുറിച്ചുള്ള വിവരങ്ങൾ ശേഖരിക്കുന്നതിനായി കാഠ്മണ്ഡുവിലെ ഇന്ത്യൻ എംബസി അടിയന്തര ഹെൽപ്പ്‌ലൈൻ നമ്പറുകൾ സജ്ജമാക്കിയിട്ടുണ്ട്. +977 985 131 6807, +977 970 910 7500 എന്നിവയാണ് ഹെൽപ്പ്‌ലൈൻ നമ്പറുകൾ.

ഭോട്ടെ കോശി നദിയിൽ പെട്ടെന്ന് ജലനിരപ്പ് ഉയർന്നതോടെയാണ് മിന്നൽപ്രളയമുണ്ടായത്. റസൂവ, നുവാകോട്ട്, ധാഡിങ് ജില്ലകളിലാണ് വലിയ നാശനഷ്ടമുണ്ടായത്. നിരവധി വീടുകളും വാഹനങ്ങളും പാലങ്ങളും തകർന്നു. നിരവധി ഗ്രാമങ്ങൾ വെള്ളത്തിനൊപ്പം ഒലിച്ചുപോയതായും റിപ്പോർട്ടുണ്ട്.

റസൂവ ജില്ലയിൽ 26 നേപ്പാൾ പൊലീസ് ഉദ്യോഗസ്ഥരെയും ആംഡ് പൊലീസ് ഫോഴ്‌സിലെ ഏഴ് പേരെയും കാണാതായിട്ടുണ്ട്. പ്രളയത്തിൽ കുടുങ്ങിയ 12 പേരെ നേപ്പാൾ സൈന്യം രക്ഷപ്പെടുത്തി. തിമുരെ, സ്യാബുബെസി മേഖലകളിലാണ് ഏറ്റവും വലിയ നാശനഷ്ടം റിപ്പോർട്ട് ചെയ്തിരിക്കുന്നത്. കാണാതായവർക്കായുള്ള തിരച്ചിലും രക്ഷാപ്രവർത്തനവും ഊർജിതമായി തുടരുകയാണ്.