സൗദി അറേബ്യയുടെ വിവിധ ഭാഗങ്ങളിൽ കഴിഞ്ഞ 24 മണിക്കൂറിനിടെ ശക്തമായ മഴ രേഖപ്പെടുത്തിയതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ജിസാൻ, മദീന, റിയാദ് മേഖലകളിലാണ് ഏറ്റവും കൂടുതൽ മഴ പെയ്തത്. വിവിധയിടങ്ങളിലായി ആകെ 92.0 മില്ലീമീറ്റർ മഴയാണ് ലഭിച്ചത്. രാജ്യത്ത് ഏറ്റവും കൂടുതൽ മഴ രേഖപ്പെടുത്തിയത് ജിസാൻ പ്രവിശ്യയിലെ ഫൈഫയിലാണ് (34.2 മില്ലീമീറ്റർ). മദീനയിലെ വാദി അൽ ഫറഇൽ 33.6 മില്ലീമീറ്ററും മഴ ലഭിച്ചു.

റിയാദിലെ അൽ അഫ്‌ലജിൽ 24.2 മില്ലീമീറ്ററും മക്ക പ്രവിശ്യയിലെ അൽ ലീത്തിൽ 12.0 മില്ലീമീറ്ററും മഴ പെയ്തിറങ്ങി. ഖസീമിലെ ഉഖ്‌ലത്ത് അൽ സുഖൂറിൽ 9.0 മില്ലീമീറ്ററും അസീറിലെ അബഹയിൽ 2.0 മില്ലീമീറ്ററുമാണ് ലഭിച്ച മഴയുടെ അളവ്. കിഴക്കൻ പ്രവിശ്യയിലെ അൽ അഹ്സയിലാണ് ഏറ്റവും കുറഞ്ഞ അളവിൽ (0.4 മില്ലീമീറ്റർ) മഴ രേഖപ്പെടുത്തിയത്. മഴയെത്തുടർന്ന് താഴ്ന്ന പ്രദേശങ്ങളിൽ വെള്ളക്കെട്ടുകൾ രൂപപ്പെടാൻ സാധ്യതയുള്ളതിനാൽ അതീവ ജാഗ്രത വേണമെന്ന് അധികൃതർ നിർദ്ദേശിച്ചു.

വരും മണിക്കൂറുകളിലും രാജ്യത്തിന്റെ വിവിധ ഭാഗങ്ങളിൽ മഴ തുടരാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. മിന്നൽ പ്രളയമുണ്ടാകാൻ സാധ്യതയുള്ളതിനാൽ വാദികൾ മുറിച്ചുകടക്കാനോ വെള്ളക്കെട്ടുള്ള പ്രദേശങ്ങളിൽ ഇറങ്ങാനോ പാടില്ലെന്ന് സിവിൽ ഡിഫൻസ് നിർദ്ദേശിച്ചു. വാഹനങ്ങൾ ഓടിക്കുന്നവർ ജാഗ്രത പാലിക്കണമെന്നും ഔദ്യോഗിക അറിയിപ്പുകൾ കൃത്യമായി ശ്രദ്ധിക്കണമെന്നും അധികൃതർ കൂട്ടിച്ചേർത്തു.